Oralda Pýshkın atyndaǵy tynymbaq qaıta ashyldy
ORAL. QazAqparat - Oralda qala kúnine oraı orystyń uly aqyny A.Pýshkın atyndaǵy tynymbaq jańartylyp, qaıta ashyldy, dep habarlaıdy «QazAqparat» tilshisi.
Onyń ashylý rásimine óńir basshysy Altaı Kólginov bastaǵan jurtshylyq ókilderi qatysty. Oral qalasynyń ákimi Murat Muqaev bıyl shahar kúni Elbasynyń «Rýhanı jańǵyrý» baǵdarlamasyna sáıkes Altyn orda kezeńine (HІІІ-HV ǵasyrlarǵa) jatatyn Jaıyq qalashyǵyn tanystyrýdan bastalyp, túrli mádenı-sporttyq sharalarmen jalǵasyp otyrǵanyn jetkizdi. Sonyń ishinde Aleksandr Pýshkın esimi de oraldyqtar úshin erekshe ystyq. Kezinde uly aqyn úsh kún aıaldap, izin qaldyrǵan qalada, mine, Pýshkın baǵy da túgeldeı jańartylyp otyr. Jalpy, bıyl qalada abattandyrý baǵytynda kóptegen jumystar jasalyp, jyl basynan beri elýden astam nysan salyndy nemese jóndeldi. Buǵan túrli qarjy kózderinen 2,5 mlrd teńge bólindi. Aýlalardy jóndeý men sport alańdary qurylysy aldaǵy jyly da jalǵasatyn bolady.
Oblystyq aýrýhana mańynda 8 myń sharshy metr aýmaqty alyp jatqan, kópten jóndelmegen tynymbaqty «Remstroıbyt» JShS (basshysy Maksat Geıýshov) eki aıdyń ishinde tolyq abattandyryp shyqty. Bul maqsatqa jergilikti bıýdjetten 45 mln teńge qaralǵan bolatyn. Aınalasy qorshalyp, jas kóshetter men gúlder egilgen. Adamdar tynyǵatyn oryndyqtar qoıylyp, trotýar órnektaspen kómkerilgen. A.Pýshkınniń músini de jańa keıipke engen.
Saltanatty sharaǵa qatysqan Reseı Federatsııasynyń Oral qalasyndaǵy bas konsýly Saıd Zabıtov Pýshkın atyndaǵy tynymbaqtyń qaıta jańartylýy eki el arasyndaǵy rýhanı jaqyndyqtyń bir kórinisi ekendigin atap ótti.
Aıta keteıik, bıyl qalanyń 4-inshi jáne 6-shaǵynaýdandary arasyndaǵy tynymbaq ta kúrdeli jóndelýde. Buǵan 113 mln teńge qarastyrylǵan.
