Oralda Prezıdenttik kópsaıystan QR ІІM birinshiligi márege jetti
QR Іshki ister mınıstrligi men «Dınamo» dene shynyqtyrý-sport qoǵamy jeke quramnyń dene daıyndyǵyn arttyrýǵa, sondaı-aq qyzmettik-qoldanbaly jáne olımpıadalyq sport túrlerin damytýǵa turaqty kóńil bólip keledi. Atalmysh birinshilik - sonyń bir dáleli. 
BQO ІІD baspasóz qyzmetinen túsken málimetke qaraǵanda, bul joly Aq Jaıyqta uıymdastyrylǵan jarysqa elimizdiń barlyq oblystarynan 15 komanda quramynda 100-den astam adam qatysty. Olar jaýyngerlik qarýdan nysana kózdeýden, júzýden, 60, 100, 1000 jáne 3000 metrge júgirýden, orynda turyp sekirýden, granata laqtyrýdan synǵa tústi.
Chempıonat qorytyndysynda jalpy esepte SQO ishki ister departamenti komandasy úzdik shyqty. Qaraǵandylyqtar ekinshi, qostanaılyqtar úshinshi orynǵa kóterildi. 
Jekeleı synda 30 jasqa deıingilerden qyzylordalyq Abzal Jaqypbaev, 35 jasqa deıingilerden qaraǵandylyq Erkebulan Qamıev, 40 jasqa deıingilerden Aqmola oblysynan kelgen Berik Nurǵalıev, 45 jasqa deıingilerden qostanaılyq Taıyr Aqanov jeńimpaz atandy.
Osy kúnderi QR quqyq qorǵaý organdary, arnaıy jáne kúshtik qurylymdary arasynda Prezıdenttik kópsaıystan «Dınamo» dene shynyqtyrý-sport qoǵamynyń VІ jazǵy salalyq spartakıadasy da ótkizildi. Bul jarysqa barlyǵy bes komanda qatysyp, jalpy esepte QR ІІM komandasy top jardy. QR UQK shekara qyzmeti komandasy ekinshi, QR ІІM Ulttyq ulany ókilderi úshinshi oryndardy bólisti. Jekeleı synda QR ІІM ókilderi Dmıtrıı Komkov (30 jasqa deıin), Sergeı Shýmkov (40 jasqa deıin), Aıdar Sáýirbaev (45 jasqa deıin) ozyq shyqty.
