Oralda Prezıdent shyrshasyna 180 oqýshy qatysty
ORAL. QazAqparat - Batys Qazaqstan oblystyq qazaq drama teatrynda dástúrli Prezıdent shyrshasy bolyp, oǵan aýdandar men qaladan jetim, ata-ana qamqorlyǵynsyz qalǵan, áleýmettik jaǵynan az qamtylǵan jáne kóp balaly otbasylardan shyqqan, sondaı-aq ár salada tabysqa jetken 180 oqýshy qatysty, dep habarlaıdy QazAqparat HAA tilshisi.
Balalardyń 126-sy aýdandardan kelse, altaýy - balalar úıiniń, 15-i - damý múmkindigi shekteýli balalarǵa arnalǵan arnaýly mektep-ınternat tárbıelenýshileri, 9-y - oblystyq mektepterdiń, 24-i - Oraldaǵy bilim ordalarynyń oqýshylary.
Shyrshany aınala, bı bılep, án salǵan jas jetkinshekter Elbasy Nursultan Nazarbaevtyń beınequttyqtaýyn tyńdady. "Qymbatty balalar! Jańa jyl - ár bala asyǵa kútetin mereıli meıram, jaqsylyq jarshysy. Bul eń aldymen balalardyń merekesi, kishkentaılardyń qýanyshy. Sender táýelsiz elde ósip kele jatqan naǵyz baqytty urpaqsyńdar! Men ózderińdi jáne elimizdegi barlyq balalardy jańa jylmen shyn júrekten quttyqtaımyn. Búgingi shyrsha toıy este qalatyn erekshe kesh bolady dep senemin. Uly dala eliniń ulaǵatty ulandary únemi aldyńǵy qatarda bolý kerek. Biz senderdiń aqyldy da alǵyr, zerdeli de zerek bolyp óskenderińdi qalaımyz. Elimizdiń bolashaǵyn senip tapsyratyn úkili úmitimiz - ózderińsizder! Sol úshin senderge bizdiń memleketimiz bar múmkindikti jasap keledi. Asqaq armandaryń oryndalyp, táýelsiz elimizben birge ósip-ónip, kórkeıe berińder! Jańa jylymyz qutty bolsyn!" - dedi Qazaqstan Prezıdenti.
Jańajyldyq shyrsha barysynda oblys ákimi Altaı Kólginov jetkinshekterge izgi tilegin bildirip, Elbasynyń quttyqtaý hatyn oqyp berdi.
Jyl keıipkerleriniń, Aıaz ata men Aqshaqardyń qatysýymen ertegi kórinisteri qoıylyp, shyrsha toıy túrli qyzyqtarǵa toly boldy.
Aıta keteıik, BQO bilim basqarmasynan túsken málimetke qaraǵanda, jańajyldyq shyrshany ótkizýge 15,7 mln. teńge bólingen. Elbasy atynan ár balaǵa ishinde qysqy kıim, aıaqkıim, sporttyq kıim, basqa da tartý-taralǵylar bar 80 myń teńgeniń syılyǵy tabys etildi.
