Oralda polıtsııa qorshaýǵa alǵan meshitten sómke tabyldy
Oral qalasynda polıtsııa qorshaýǵa alǵan meshitten sómke tabyldy, dep habarlaıdy Kazinform.
BQO polıtsııa departamenti baspasóz qyzmetinen túsken málimetke qaraǵanda, oqıǵa 1 qarasha kúni qala ortalyǵynda túske jaqyn boldy.
"Saǵat shamamen 12.30-da ortalyq bazar mańyndaǵy "Azıza" saýda úıi aýdanynda ornalasqan meshitten sómke tabylǵany jóninde 102 nómirine qońyraý shalynǵan. Jaqyn mańdaǵy polıtsııa jasaqtary dereý jiberilip, sol aýdan qorshaýǵa alyndy. Oqıǵa ornyna BQO polıtsııa departamenti arnaıy mamandary (saperlar) men qyzmettik ıtteri bar kınologter keldi. Tekserý barysynda sómkede jeke zattar bar ekendigi anyqtaldy. Qazirgi kezde oqıǵanyń jaı-japsary anyqtalyp jatyr", - dep habarlady vedomstvodan.
Eske sala keteıik, budan buryn Oralda 85 jastaǵy keıýanany uryp-soǵyp, tonap ketkenin jazǵan bolatynbyz.
