Oralda polıtseıler iz-túzsiz joǵalǵan úsh adamdy bir táýlikte tapty

ASTANA. KAZINFORM — Oraldada bir táýlik ishinde krımınaldyq polıtseıler buryn iz-túzsiz joǵalǵan úsh azamatty anyqtap, tapty. Birinshi jaǵdaıda 2014 jylǵy bala joǵalyp ketken. Ony izdeýge BQO polıtsııa departamentiniń barlyq bólimshesi jumyldyryldy, dep habarlaıdy ІІM baspasóz qyzmeti.

Jedel-izdestirý sharalarynyń nátıjesinde bala qalanyń saýda-oıyn-saýyq ortalyqtarynyń birinen tabyldy. Ol ata-anasyna tapsyryldy. Onyń ómiri men densaýlyǵyna eshqandaı qaýip joq.

Ekinshi jaǵdaıda polıtsııa qyzmetkerleri 1993 jyly týǵan, shamamen jarty jyl boıy úıine kelmegen áıeldi tapty. Aqpan aıynyń sońynda onyń anasy polıtsııaǵa júginip, tamyz aıynan beri qyzyn kórmegenin habarlaǵan. Іzdestirý sharalary barysynda áıeldiń mekenjaıy anyqtalyp, anasymen kezdesti.

Sondaı-aq polıtseıler 1994 jyly týǵan jas jigitti tapty. Ol 2 naýryz kúni keshke úıinen shyǵyp ketip, qaıta oralmaǵan. Onyń júrip ótken baǵyty jedel basqarý ortalyǵynyń beınebaqylaý kameralary arqyly tirkelgen. Nátıjesinde, er adam qańyrap bos turǵan úılerdiń birinen aman-esen tabyldy. Onyń aqyl-esi kem ekeni anyqtaldy. Qazirgi ýaqytta ol ata-anasyna tapsyryldy.

— Polıtsııa azamattardy balalarǵa muqııat bolýǵa, jaqyndarynyń joǵalǵany týraly dereý habarlaýǵa, týystarymen baılanysta bolýǵa jáne erekshe qamqorlyq pen nazardy qajet etetin adamdarǵa asa kóńil bólýge shaqyrady, — delingen habarlamada.

Buǵan deıin Oral qalasynda bloger úsh jylǵa bas bostandyǵynan aıyrylǵanyn jazdyq.