Oralda polıtseıler 7-qabat terezesinen qulap kete jazdaǵan balany qutqardy
ASTANA. KAZINFORM – Oralda polıtsııa qyzmetkerleri kópqabatty úıdiń 7-qabatyndaǵy terezege shyǵyp ketken 4 jasar balany qutqaryp qaldy, dep habarlaıdy Polisia.kz.
Oqıǵa búgin saǵat 14:10 shamasynda bolǵan. «102» arnasyna Oral qalasyndaǵy Móńkeuly kóshesinde ornalasqan kópqabatty turǵyn úıdiń 7-qabatyndaǵy páter terezesine kishkentaı balanyń shyǵyp ketkeni týraly habar túsken.
Oqıǵa ornyna jaqyn mańda bolǵan Batys Qazaqstan oblysy polıtsııa departamenti patrýldik polıtsııa batalonynyń qyzmetkeri Rysbek Agzamov kómek surap aıqaılaǵan áıeldiń daýysyn estip, joǵary qaraǵanda terezede turǵan balany baıqaıdy.
Polıtseı ýaqyt joǵaltpaı kómek kórsetýge umtylǵan. Qutqarý jumystaryna Báıterek aýdandyq polıtsııa bóliminiń qyzmetkeri Rafael Ishakaev ta qosyldy.
Sondaı-aq osy úıde turatyn Oral qalasy polıtsııa basqarmasynyń qabyldaý-taratý ornynyń polıtsııa júrgizýshisi Batyrbek Seıitov túski úziliste úıinde bolǵan. Ol jaǵdaıdy estı sala qajetti quraldaryn alyp shyǵyp, qulyptaýly páterdiń esigin ashýǵa kómektesken.
– Páter esigi ashylǵannan keıin Rysbek Agzamov ishke birinshi bolyp kirip, terezege shyǵyp alǵan shamamen tórt jasar balany qaýipsiz jerge túsirdi. Osylaısha polıtseılerdiń jedel áreketiniń arqasynda balanyń ómiri saqtaldy, – dep habarlady polıtsııadan.
Aldyn ala málimet boıynsha, oqıǵa kezinde balanyń anasy qysqa ýaqytqa syrtqa shyǵyp ketken. Bala páterde jalǵyz qalǵan. Atalǵan derek boıynsha ata-anasy zańnamaǵa sáıkes jaýapkershilikke tartyldy.
Polıtsııa ata-analarǵa balalardy úıde qaraýsyz qaldyrmaýdy, terezelerge arnaıy qorǵanys qurylǵylaryn ornatýdy jáne qaýipsizdik sharalaryn saqtaýdy eskertti.
– Balanyń ómiri men qaýipsizdigi – eń basty qundylyq. Bir sáttik nemquraılylyq orny tolmas qaıǵyǵa ákelýi múmkin, – dep atap ótti vedomstvodan.
Aıta keteıik, qutqarýshylar Kólsaıda jylan shaqqan 16 jastaǵy qyzdy aýrýhanaǵa jetkizdi.
