Oralda polıtseıden qashqan turǵyn jol apatyn jasap, júrgizýshini mert qyldy
ORAL. KAZINFORM — Oral qalasynyń turǵyny aq tústi Renault Logan avtokóligin urlap aıdap ketken.
BQO polıtsııa departamentiniń baspasóz qyzmetinen málim etkenindeı, oqıǵa 1 qyrkúıek kúni boldy.
Kúdikti jol qozǵalysy erejelerin óreskel buzyp, joldaǵy basqa qatysýshylarǵa qaýip tóndirip, polıtsııa qyzmetkerleriniń toqtaý týraly zańdy talabyna baǵynbaǵan.
Nazarbaev kóshesiniń boıynda baǵdarshamnyń tyıym salatyn belgisin elemeı, Nazarbaev pen Karev kósheleriniń qıylysynda Lada Granta jáne Lada Largus avtokólikterimen soqtyǵysqan.
Osy jol-kólik oqıǵasy saldarynan Lada Granta avtokóliginiń júrgizýshisi aýyr jaraqat alyp, aýrýhanada qaıtys boldy.
- Kúdikti de dene jaraqattaryn alyp, medıtsınalyq mekemege jetkizildi, qazir ony polıtsııa kúzetip otyr. Atalǵan derek boıynsha qylmystyq is qozǵaldy. Qazirgi ýaqytta oqıǵanyń barlyq mán-jaıyn anyqtaý maqsatynda tergeý amaldary júrgizilip jatyr, - dep habarlady vedomstvodan.
Turǵyndardyń sózine qaraǵanda, marqumnyń sońynda áıeli, eki balasy qaldy.
Eske sala keteıik, budan buryn batysqazaqstandyq ata-ananyń 25 jyldan keıin amerıkalyqtar asyrap alǵan qyzymen kezdeskenin jazǵan edik.