Oralda polıtsııa qyzmetkeri taıaqshasyn avtokólikke laqtyrdy
ORAL. QazAqparat – Oralda polıtsııa qyzmetkeri taıaqshasyn avtokólikke laqtyrdy, dep habarlaıdy QazAqparat tilshisi.
Bul oqıǵa beınejazba arqyly áleýmettik jelilerde taraldy.
Beınejazbada áıel daýsy jolǵa belgi qoıylyp, jumystar jasalyp jatqandyqtan, óziniń úıine barýǵa avtokóligin Nurlan Dúısenov degen polıtsııa qyzmetkeriniń jibermegenin aıtady. Onymen qoımaı, polıtsııa qyzmetkeri avtokóliktiń kiltin alyp alǵan.
BQO polıtsııa departamentiniń baspasóz qyzmeti málim etkenindeı, patrýldik qyzmet ınspektory, polıtsııa leıtenanty N.Dúısenov 13 qyrkúıek kúni Eýrazııa men N.Nazarbaev dańǵyldary qıylysynda taıaqshanyń kómegimen jol qozǵalysyn rettegen.Atap aıtqanda, jaıaý júrginshi ótkelin jaryqtandyrý úshin metall konstrýktsııasyn ornatý jumystary júrgizilýine baılanysty N.Nazarbaev dańǵylynan Almazov kóshesine qaraı jol qozǵalysy shektelgen.
Qyzmettik mindetin atqarý kezinde N.Dúısenov memlekettik qyzmetshilerdiń qyzmet etıkasy erejesin buzýǵa jol bergen. Ol 1990 jylǵy Elızaveta Pokatıloǵa tıesili «Folksvagen Passat» avtokóliginiń kiltin alyp alǵan. Sondaı-aq tyıym salynǵan belgige qaramastan, osy tustan toqtamaı ótip ketken «Gazel» avtokóliginiń (ınkassator) artynan taıaqshasyn laqtyrǵan.
«Atalǵan oqıǵa boıynsha qyzmettik tekserý júrgizilip, onyń qorytyndysy keıin aıtylatyn bolady», dep habarlady departamenttiń baspasóz qyzmetinen.
