Oralda polıtsııa qyzmetkeri kóligimen «Lexus»-qa soqtyǵysyp, eki adam jaraqat aldy
ORAL. QazAqparat - Oralda polıtsııa qyzmetkeri avtokóligimen túıisip, eki adam jaraqat aldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa búgin túnde oryn aldy.
Oral qalasy polıtsııa basqarmasy jol-patrýldik polıtsııa batalonynyń qyzmetkeri "Skoda Octavia" avtokóligimen Qurmanǵazy kóshesimen kele jatyp, «Lexus» avtokóligimen soqtyǵysýǵa jol bergen.
Qazirgi kezde atalǵan derek boıynsha qyzmettik tekserý júrgizilýde.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, Qurmanǵazy men J.Dosmuhamedov kósheleri qıylysynda bolǵan jol apatyna baılanysty saǵat 00.46-da jedel járdem shaqyryldy.
«Oqıǵa saldarynan 1993 jáne 1997 jylǵy eki er adam zardap shekti. Olar oblystyq kópbeıindi aýrýhanaǵa jatqyzyldy», dedi QazAqparat tilshisine A.Saqposynova.
