Oralda polıtsııa qyzmetkeri kóligimen balany qaǵyp ketti
ORAL. QazAqparat - Oralda polıtsııa qyzmetkeri kóligimen balany qaǵyp ketti, dep habarlaıdy QazAqparat tilshisi.
Oqıǵa 5 aqpan kúni keshkisin Zachagan kentindegi E.Brýsılovskıı kóshesi boıynda oryn aldy.
«Nıva» avtokóligi balany qaǵyp ketken.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdem saǵat 20.13-te shaqyryldy. Jedel járdem kóligi 20.19-da jetken. 2007 jylǵy bala oblystyq aýrýhanaǵa jetkizildi.
«Oblystyq aýrýhanada balany neırohırýrg qarady. Odan oblystyq balalar aýrýhanasyna joldaǵan. Onda hırýrg qarap, jaǵdaıy jaman emestigin aıtyp, aýrýhanada jatqyzýdyń qajeti joq dep sheshken. Ambýlatorlyq em alýǵa jiberilgen. Balanyń betinde isik bar», dedi A.Saqposynova.
BQO polıtsııa departamentiniń baspasóz qyzmeti bolǵan oqıǵany rastap, qazirgi kezde qyzmettik tekserý júrgizilip jatqandyǵyn jetkizdi. Qyzmettik «Nıva-21214» avtokóliginiń rýlinde polıtsııa departamenti avtosharýashylyǵynyń júrgizýshisi bolǵan. Baspasóz qyzmetinen túsken málimet boıynsha bala jolǵa júgirip shyqqan. Ony qaqpaý úshin júrgizýshi kóligimen qarsy betke shyǵyp baryp, joldan túsip ketken.
