Oralda polıtsııa kóligi tártip buzýshyny qýamyn dep, qorshaýdy qaqty
ORAL. QazAqparat - Oralda polıtsııa kóligi tártip buzýshyny qýamyn dep, jeke úıdiń qorshaýyn qaqty, dep habarlaıdy QazAqparat tilshisi.BQO ishki ister departamentiniń baspasóz qyzmetinen túsken málimetke qaraǵanda, oqıǵa 30 mamyr kúni oryn aldy.
Keshki saǵat 21.05 shamasynda departamenttiń jol-patrýldik batalony patrýldik avtokóliginiń ekıpajy «Oral-Saratov» joly boıynda «Kondensat» janar-jaǵarmaı quıý stansasyna qarsy bette «Ravon R» avtokóliginiń jyldamdyqty shekten tys arttyrǵanyn baıqaıdy. Toqtaý jónindegi belgige qaramastan, atalǵan kóliktiń júrgizýshisi Pıatımar kóshesimen sytylyp ketpek bolady. Polıtsııa kóligi onyń artynan qýa jóneledi.
Slamıhın kóshesimen qýyp kele jatqan mezgilde joldyń kedir-budyry saldarynan polıtsııanyń «Shkoda Oktavııa» kóliginiń aldyńǵy sol jaq dońǵalaǵynyń jeli shyǵyp ketip, mashına jeke úıdiń temir qorshaýyna baryp soǵylady.
Degenmen jol-patrýldik polıtsııa qyzmetkerleriniń úılesimdi is-qımyly nátıjesinde 1987 jylǵy A degen júrgizýshi júrgizgen «Ravon R4» kóligi Tarǵyn kóshesinde toqtatyldy.
Medıtsınalyq kýálandyrý qorytyndysyna sáıkes júrgizýshi avtokólikti mas kúıinde júrgizgen bolyp shyqty.
Atalǵan oqıǵa boıynsha A-ǵa qatysty QR Ákimshilik quqyqbuzýshylyq kodeksi 608-baby 1-bóligi (kólikti mas kúıinde aıdaý), 613-baby 1-bóligi (toqtaý jónindegi zańdy talapty oryndamaý) jáne 592-baby 3-bóligine (jyldamdyqty shekten tys arttyrý) sáıkes úsh ákimshilik is qozǵalyp, avtokólik arnaıy turaqqa qoıyldy.
«Jeke úıdiń ıesine keltirilgen materıaldyq shyǵynnyń orny toltyryldy. Polıtsııa qyzmetkerlerine qatysty odan shaǵym túsken joq. Zardap shekkender joq», dedi BQO ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllın.
