Oralda polıtseıge shabýyl jasaǵan turǵyn qamaýǵa alyndy
BQO polıtsııa departamentiniń baspasóz qyzmetinen málim etkenindeı, oqıǵa 19 jeltoqsan kúni saǵat 03.50-de Muhıt pen D.Nurpeıisova kósheleriniń qıylysynda boldy.
«32 jastaǵy júrgizýshi aıdap kele jatqan «VAZ-2110» avtokóligi toqtatyldy. Medıtsınalyq kýálandyrýǵa sáıkes júrgizýshi orta dárejeli mas kúıinde bolǵan. Onyń ústine budan buryn jeti jylǵa kólik quralyn basqarý quqyǵynan aıyrylǵan bolyp shyqty. Júrgizýshiniń qasynda onyń 24 jastaǵy dosy bolǵan. Avtokólikti arnaıy turaqqa rásimdep jatqan kezde júrgizýshiniń dosy polıtsııa ınspektoryna buraýyshpen birneshe ret soqqy jasaǵan. Qylmysty jasaǵan kezde ol mas kúıinde bolǵan», dedi polıtsııa maıory Darıǵa Májıtova.
Polıtsııa qyzmetkerine shabýyl jasaǵan jolaýshyǵa qatysty QR QK 380-baby 1-bóligine sáıkes qylmystyq is qozǵalyp, ol qamaýǵa alyndy. Bul bap boıynsha aıypty dep tanylǵan adam eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
Júrgizýshi QR QK 346-babyna sáıkes jaýapqa tartylatyn bolady. Bul bap boıynsha kólikti basqarý quqyǵynan ómir boıyna aıyrý, iri mólsherde aıyppul, bas bostandyǵyn shekteý nemese aıyrý jazasy qarastyrylǵan.
Eske sala keteıik, budan buryn Oralda eki aktokólik soqtyǵysyp, úsh adamnyń aýrýhanaǵa túskenin jazǵan bolatynbyz.
Foto: BQO polıtsııa departamentiniń baspasóz qyzmeti