Oralda polıtseıge para bermek bolǵan mas júrgizýshi ustaldy

ORAL. QazAqparat – Oralda polıtseıge para bermek bolǵan mas júrgizýshi ustaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, patrýldik polıtsııa batalony qyzmetkerleri toqtatqan kezde rýlde M. degen azamat bolǵan.

Mas kúıinde qolǵa túskendikten, ol máseleni sheshpek bolyp, polıtseılerge 5 myń teńge usynǵan.

Atalǵan derek boıynsha júrgizýshige qatysty QR QK 367-babyna (para berý) sáıkes qylmystyq is qozǵaldy. Ol sondaı-aq QR Ákimshilik quqyqbuzýshylyq kodeksi 608-babyna (júrgizýshiniń mas kúıinde kólik quralyn basqarýy) sáıkes jaýapqa tartylatyn bolady.

Eske sala keteıik, budan buryn Oralda qyz zorlady degen kúdikpen 2 adamnyń qamaýǵa alynǵanyn, BQO densaýlyq saqtaý basqarmasynyń burynǵy basshysyna qatysty úkimniń ózgerissiz qaldyrylǵanyn jazǵan bolatynbyz.