Oralda perzenthana qyzmetkeriniń ólimi: tórt jyldan keıin úkim shyǵaryldy

ORAL. KAZINFORM — Oral qalalyq sotynda oblystyq perınataldyq ortalyqtyń burynǵy dırektory Janna Dilmanovanyń isi qaraldy.J.Dilmanovaǵa QR QK 254-babyna (mindetterine adal qaramaý) sáıkes aıyp taǵylǵan edi.

Qaıǵyly oqıǵa 2021 jyly 31 jeltoqsan kúni boldy. Perınataldyq ortalyqta lıfter bolyp jumys istegen 50 jastaǵy áıel kóz jumdy. Marqum júk lıftisiniń kabınasy men shahtasynyń arasyna qysylyp qalǵan. Oqıǵa ornynda jan tapsyrǵan onyń denesin qutqarýshylar alyp shyqty.

Qalalyq sottyń sýdıasy Aızada Jumaǵulovanyń málim etkenindeı, J.Dilmanova kinásiz dep tanyldy. Ol qylmystyq quramnyń bolmaýyna baılanysty aqtaldy.
Sonymen qatar materıaldyq jáne moraldyq zalaldy óndirý týraly azamattyq talap aryz qaraýsyz qaldyryldy.

Sýdıa tergeýdiń birjaqty, aıyptaý baǵytynda júrgizilgenin, tergeýshiler tarapynan zańbuzýshylyqqa jol berilgenin atap ótip, jeke uıǵarym shyǵardy.
Sot úkimi zańdy kúshine engen joq.

Eske sala keteıik, budan buryn BQO-da mas kúıinde kólik aıdaǵan mektep dırektorynyń sógispen qutylǵanyn jazǵan edik.