Oralda pedagog 5 mektepte 64 saǵatqa deıin júktememen jumys istegen
ORAL. KAZINFORM — Oral qalalyq bilim berý bólimi shahardaǵy barlyq 54 memlekettik mektepte josparly monıtorıng júrgizgen kezde zańbuzýshylyq anyqtaldy.
Atalmysh bólimniń baspasóz qyzmetinen málim etkenindeı, monıtorıng nátıjesinde keıbir muǵalimderdiń bir ýaqytta 5 mektepte jumys istep, aptasyna 64 saǵatqa deıin júkteme alǵany belgili boldy.
Bul belgilengen 16 saǵattyq normadan 4 ese kóp. Mundaı jaǵdaı olardyń jalaqysyn arttyrýǵa múmkindik bergen, óıtkeni eńbekaqy jumys istegen saǵat sanyna qaraı esepteledi.
Keıbir jaǵdaılarda birneshe mekteptegi sabaq kesteleri bir-birimen qatar kelýi oryn alǵan. Mektepter arasyndaǵy qashyqtyq 15-25 shaqyrym bolýy asa nazar aýdartady jáne jaǵdaıdy kúrdelendiredi. Aldyn ala esepteýlerge sáıkes, bir oqý jyly ishinde shamamen 100–170 sabaqtyń ótkizilmeı qalý qaýpi bar.
— Atalǵan derekter QR Eńbek kodeksiniń, sondaı-aq «Bilim týraly», «Bala quqyqtary týraly» jáne «Pedagog mártebesi týraly» zańdarynyń óreskel buzylýyn týǵyzyp otyr. Osyǵan baılanysty eńbek tártibiniń buzylýy pedagog mártebesine nuqsan keltirip, bilim berý úderisiniń sapasyna keri áser etedi. Anyqtalǵan derekter boıynsha materıaldar tıisti sharalar qabyldaý jáne quqyqtyq baǵa berý úshin ýákiletti organdarǵa joldandy, — dep habarlady vedomstvodan.
Qazirgi tańda Batys Qazaqstan oblysynyń bilim berý júıesi basqarýdyń tsıfrlyq ádisterin qoldanyp, oqý josparlaryn, pedagogterdiń júktemesin jáne olardyń oryndalýyn tereń taldaýǵa múmkindik alyp otyr. Ár mektepte oqýshylardyń qaýipsizdigin qamtamasyz etýmen qatar pedagogter men qyzmetkerlerdiń jumys tártibin baqylaýǵa múmkindik beretin beınebaqylaý júıeleri de iske qosylǵan.
Eske sala keteıik, budan buryn Oralda jasóspirimniń soqqyǵa jyǵylýyna baılanysty mektep dırektory qyzmetinen bosatylǵanyn jazǵan bolatynbyz.
