Oralda páterden altyn buıymdar jymqyrǵan urylar ustaldy
ORAL. QazAqparat – Oralda páter urylary ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen málim etkendeı, birinshi oqıǵa 20 jeltoqsan kúni H.Dospanova kóshesinde tirkelgen.
Saǵat 09.00 men 19.30 aralyǵynda 1975 jylǵy eki qaraqshy úıge tereze arqyly kirip, altyn buıymdar men 30 myń Reseı rýblin jymqyryp ketken. Úı ıesine 321,3 myń teńge shyǵyn keltirildi.
Kúdiktiler ýaqytsha oqshaýlaý ızolıatoryna qamaldy.
Taǵy bir oqıǵa A.Matrosov kóshesinde 21 jeltoqsan kúni boldy. Polıtsııa qyzmetkerleriniń qyraǵylyǵy arqasynda shamamen saǵat 17.00-de 29 jáne 39 jastaǵy er adamdar ustaldy.
Oblystyq Polıtsııa departamentiniń bastyǵy mindetin atqarýshy Erlan Omarbekovtiń aıtýynsha, turǵyn úıden noýtbýk pen altyn buıymdar urlanǵan. Sondaı-aq olardy qaraý kezinde kúdiktilerdiń birinen esirtkige tán ısi bar sur-jasyl tústi zat tabyldy.
Oral qalasy polıtsııa basqarmasynyń naqtylaýynsha, urylar basqa da zattardy úptep ketken. Munyń jalpy quny 150 myń teńgeni qurady.
Kúdiktilerdiń ekeýi de – Oral qalasynyń turǵyny. Olar páter urlyǵy jáne esirtki qylmysy úshin budan buryn da birneshe ret qylmystyq jaýapkershilikke tartylǵan. Esh jerde jumys jasamaıdy.
Qazirgi kezde eki oqıǵa boıynsha QR QK 188-baby 3-bóligine (urlyq) sáıkes tergeý amaldary júrgizilýde.
Aıta keteıik, Oral qalasynda jyl basynan beri 1625 urlyq deregi tirkelse, sonyń 294-i – páter urlyǵy.
Budan buryn 25 jastaǵy turǵyn da polıtseılerden qutylmady. Ol 6-7 qarasha kúnderi N.Tilendıev kóshesindegi turǵyn úıdiń terezesinen kirip, 51 jastaǵy áıelge tıesili 400 myń teńgeni jymqyryp ketken. Bul is te tergelý ústinde.
