Oralda páterde taraqanǵa qarsy ý sebilgen: 5 adam aýrýhanaǵa jetkizildi

ORAL. KAZINFORM – Oralda páterde taraqandy joıý úshin ý sebilgennen keıin 5 adam aýrýhanaǵa jetkizildi.

BQO polıtsııa departamentiniń baspasóz qyzmetinen málim etkenindeı, oqıǵa 19 qańtar kúni 1-Zavokzalnyı tuıyq kóshesi 61/3-mekenjaıynda boldy.

«Óz páterinde 1988 jylǵy turǵyn taraqandy joıý úshin hımııalyq zatty sepken. Saldarynan hımııalyq zattan ýlanǵan 1951 jáne 1974 jylǵy kórshiler qalalyq aýrýhanaǵa jetkizildi», dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, jedel járdemge shaqyrtý saǵat 22.01-de túsken.

Barlyǵy bes adam zardap shekken. Jedel járdem brıgadasymen 1974 jylǵy er adam, 1951, 1982, 1992 jylǵy áıelder jáne 2018 jylǵy qyz bala qalalyq kópbeıindi aýrýhanasyna jetkizildi. Olardyń bárin dárigerler qarap, tańǵa deıin qaldyrylǵan. Barlyǵynyń jaǵdaıy qanaǵattanarlyq. 20 qańtar kúni ambýlatorııalyq emdeýge jiberildi.