Oralda Parlament depýtattary Assambleıa múshelerimen kezdesti

ORAL. QazAqparat - Búgin Oraldaǵy Dostyq úıinde Parlament depýtattary oblys ákimi Altaı Kólginovpen birge Qazaqstan halqy Assambleıasynyń múshelerimen kezdesti, dep habarlaıdy «QazAqparat» HAA tilshisi.

Onda Elbasy Joldaýynyń negizgi baǵyttary sóz bolyp, engizilgeli otyrǵan konstıtýtsııalyq ózgerister talqylandy.

 

Aldymen óńir basshysy QHA múshelerine el birligin nyǵaıtý, qoǵamdyq kelisimdi ornyqtyrý baǵytyndaǵy jemisti qyzmeti úshin alǵysyn bildirip, Joldaýǵa baılanysty oblysta atqarylatyn basty jumystar jóninde baıan etti. Atap aıtqanda, ónerkásip, aýyl sharýashylyǵy jáne basqa salalarda jańǵyrtý jumystary júrgizilip, ozyq tehnologııalardy engizýge baǵyt ustalmaq. Mysaly, bilim salasynda oblystyń 200 mektebi joǵary jyldamdyqtaǵy ǵalamtor jelisimen qamtamasyz etilmek. Kásipkerlikti damytýǵa da memleket tarapynan qoldaý kórsetile bermek.
 

Basqosý barysynda Senat depýtattary Birǵanym Áıtimova, Rashıt Ahmetov, Erbolat Muqaev saıası reforma aıasynda júzege asyrylmaqshy konstıtýtsııalyq ózgeristerdiń mán-mańyzyna, Joldaýǵa baılanysty ekonomıka salasynda qolǵa alynatyn sharalar álemdi jaılaǵan daǵdarystan jol tabýǵa járdemdesetinine, osynyń bári halyqtyń ál-aýhatyn arttyrý maqsatynda jasalyp otyrǵanyna toqtaldy. Májilis depýtaty Ahmet Mýradov Qazaqstandaǵy turaqtylyqty saqtap, ultaralyq tatýlyqty bekite túsýge árkimniń de úles qosýy kerektigin, bul oraıda BQO-da oń tájirıbe jınaqtalǵanyn atap ótti.

Parlament depýtattarynyń mekeme-uıymdardaǵy kezdesýleri budan keıin de jalǵasyn tapty.