Oralda paravoleıboldan Qazaqstan chempıonaty men kýbok oıyndary máresine jetti
ORAL. KAZINFORM - Oblystyq mamandandyrylǵan olımpıada rezerviniń balalar men jasóspirimder mektebi zalynda tirek-qımyl apparaty zaqymdalǵan sportshylar arasynda paravoleıboldy otyryp oınaýdan Qazaqstan kýbogi oıyndary aıaqtaldy.
Jarysqa Astana qalasy, Aqtóbe, Batys Qazaqstan, Jambyl, Qaraǵandy, Qostanaı jáne hattamadan tys Qyzylorda oblysy komandasy qatysty.
Fınaldyq báseke Jambyl men Aqtóbe oblystary arasynda tartysty ótti. Jambyldyqtar 3:1 (25:23, 25:22, 19:25, 25:20) esebimen utyp, kýbok ıegeri atandy.
Qaraǵandy oblysy ókilderin 3:0 esebimen tize búktirgen astanalyqtar úzdik úshtikke ilikti.
Sonymen qatar tirek-qımyl apparaty zaqymdalǵan ardager sportshylar arasynda ótken
Qazaqstan chempıonatyna 9 komanda qatysty. Munda qyzylordadyqtar jeńimpaz atansa, aqtóbelikter ekinshi, astanalyqtar úshinshi orynǵa ıe boldy.
Paravoleıboldy otyryp oınaýdan Qazaqstan ulttyq quramasy 2023 jyly Astana qalasynda ótken Azııa chempıonatynda ekinshi oryn alyp, Parıj paralımpıadasy oıyndaryna joldama alǵan edi.
Ulttyq qurama múshesi, halyqaralyq dárejedegi sport sheberi, ulttyq sport tóreshi, paravoleıboldy otyryp oınaýdan Qyzylorda oblysynyń aǵa jattyqtyrýshysy Erik Qasqabaevtyń aıtýynsha, kýbok oıyndaryna el birinshiliginde júldeli oryn alǵan komandalar qatysqan joq.
«Qyzylorda oblysynan sheberligin shyńdaý úshin jastardy alyp keldik. Olar hattamadan tys qatysqandyqtan, oıyn nátıjesi esepke alynbady. Al ardagerlerimiz úzdik shyqty. Ózim ulttyq quramada jıyrma jyldaı oınap kelemin. Bas bapker Baýyrjan Tahaýov jattyqtyratyn qurama negizin atyraýlyqtar quraǵanymen, Qyzylorda, Mańǵystaýdan, Shymkentten sportshylar bar. 17 naýryzda Astanada jınalamyz, sodan keıin oqý-jattyǵý jıyny bastalady. Basty maqsat — Parıj paralımpıadasyna tyńǵylyqty daıyndalý», - dedi Erik Qasqabaev.
