Oralda paraqor polıtseılerge 17,5 mln teńgeden aıyppul salyndy
ORAL. QazAqparat - Oralda para alǵan polıtsııa qyzmetkerlerine qatysty sot úkimi shyqty, dep habarlaıdy «QazAqparat» tilshisi.
Sot talqysynda belgili bolǵanyndaı, kámeletke tolmaǵandar isi jónindegi ınspektorlar alkogol ónimin jasóspirimge satqany úshin dúken ıesin 250 myń teńge para berýge májbúrlegen. 27 jastaǵy polıtsııa kapıtany Alfııa Habıbýllına men 20 jastaǵy leıtenant Ásem Naızabekova 2017 jylǵy qazan aıynyń aıaǵynda azyq-túlik dúkeninde kámeletke tolmaǵandarǵa alkogoldy ishimdik satylatynyn anyqtaǵan. Jazadan qutqarý úshin dúken ıesine 300 myń teńge tóleýdi usynyp, keıin 250 myń teńgege kelisken. Al 4 qarasha kúni taǵy bir ınspektor Baqytjamal Esenálıeva dúken ıesinen aqsha alý ústinde BQO ІІD ózindik qaýipsizdik basqarmasy qyzmetkerleriniń qolyna túsken.
Oral qalalyq sotynyń úkimimen A.Habıbýllına, B.Esenálıeva jáne Á.Naızabekova QR QK 366-baby 3-bóligi 2-tarmaǵyna sáıkes (adamdar tobynyń aldyn ala sóz baılasýymen laýazymdy qyzmetkerdiń eleýli kólemde para alýy) aıypty dep tanylyp, olardyń árqaısysyna paranyń jetpis eselengen mólsherinde aıyppul salyndy. ıAǵnı olardyń árqaısysy sot úkimi kúshine engennen keıin bir aıdyń ishinde 17,5 mln teńgeni tóleýi tıis. Eger sottalýshylar aıyppuldy tólemegen jaǵdaıda bas bostandyǵynan aıyrylatyn bolady. Oǵan qosa burynǵy polıtsııa qyzmetkerleri jergilikti ózin-ózi basqarý jáne memlekettik organdarda laýazymdy qyzmet atqarý quqyǵynan ómir boıyna aıyryldy. Sonymen qatar A.Habıbýllına men B.Esenálıeva kapıtan, Á.Naızabekova leıtenant shenimen qosh aıtysty.
Sýdıa BQO ІІD basshylyǵy tarapyna qaraýyndaǵy qyzmetkerlerdi tárbıeleý baǵytynda sharalardy qolǵa alý jóninde jeke uıǵarym shyǵardy.
Sot úkimi zańdy kúshine engen joq.
