Oralda para bergen basshy 7,2 mln teńge aıyppul tóleıtin boldy
Atalmysh sottan túsken málimetke qaraǵanda, bıylǵy 18 maýsymda BQO prokýrory qaýlysynyń negizinde «Jaıyqjylýqýat» AQ-nyń qyzmetine tekserý júrgizilgen.
Tıisti sala qyzmetkerleri, sonyń ishinde BQO boıynsha memlekettik kirister departamentiniń mamany B.Jabasov qatysqan tekserý barysynda metall qaldyqtarynyń kásiporyn aýmaǵynan zańsyz shyǵarylǵany anyqtaldy. Metall qaldyqtaryn qabyldaý pýnktine tapsyrýdan túsken 800 myń teńge kólemindegi qarjy «Jaıyqjylýqýat» AQ-nyń kassasyna túspegen.
Metall qaldyqtaryn kásiporyn júrgizýshisi qyzmettik kóligimen atalmysh pýnktke N.Jumalıevtiń jeke nusqaýymen jetkizgen.
Osy derekti jasyryp-jaýyp, tekserý aktisinde kórsetpeý úshin N.Jumalıev shilde aıynda B.Jabasovqa 500 myń teńge syıaqy usynǵan. Biraq B.Jabasov bul jóninde memlekettik kirister departamentiniń basshysyna málim etken.
N.Jumalıev óziniń qylmystyq is-áreketin jalǵastyryp, 20 shilde kúni qyzmettik kabınetinde B.Jabasovqa atalǵan aqsha hatshynyń jumys ústeliniń birinshi sóresinde jatqanyn aıtqan. Alaıda B.Jabasov ony alýdan bas tartqan. N.Jumalıev munymen toqtamaı, sol ǵımarat ishinde 480 myń teńge aqshasy bar konvertti B.Jabasovtyń qaltasyna salyp, boı tasalaǵan.
Osylaısha N.Jumalıev QR QK 367-baby 2-bóligine sáıkes keletin qylmysqa barǵan.
Prokýror, kúdikti jáne onyń qorǵaýshysy arasynda protsessýaldyq kelisim jasalyp, is sol negizde qaraldy.
Oral qalalyq sotynyń úkimimen N.Jumalıev QR QK 367-baby 2-bóligine sáıkes aıypty dep tanylyp, oǵan múlkin tárkileýsiz, paranyń on bes eselengen mólsherinde, ıaǵnı 7,2 mln teńge aıyppul salyndy. Sonymen qatar, ol memlekettik qyzmette laýazymdy jáne jarǵylyq qarjysynda memleket úlesi 50 paıyzdan asatyn uıymdarda basshylyq qyzmet atqarý quqyǵynan ómir boıyna aıyryldy.
Sot úkimi zańdy kúshine engen joq.