Oralda para alǵan polıtsııa qyzmetkerine 7 mln teńge aıyppul salyndy
Oral qalalyq sotynyń baspasóz qyzmetinen málim etkenindeı, atalǵan polıtsııa qyzmetkeri QR QK 366-baby 2-bóligi (para alý) jáne 369-baby 2-1-bóligine (qyzmettik jalǵandyq jasaý) sáıkes aıypty dep tanyldy.
Sot talqysynda málim bolǵanyndaı, Q.Muqanov Oral qalasy polıtsııa basqarmasy kóshi-qon qyzmeti bóliminiń bastyǵy bolyp qyzmet atqara júrip, ótken jyldyń 27 qyrkúıek kúni reseılik azamatqa Qazaqstan azamattyǵynyń joqtyǵy týraly anyqtamany tezdetip berip, 50 myń teńge para alǵan.
Ol óz kinásin moıyndady.
Atalǵan eki bapqa sáıkes Q.Muqanovqa 8 mln 751 myń teńge kóleminde aıyppul salyndy. Ol sondaı-aq memlekettik qyzmette jáne basqa organdarda qyzmet atqarý quqyǵynan ómir boıyna aıyryldy.
Sonymen qatar QR QK 62-baby 3-1-bóligine sáıkes sottalýshynyń 11 sáýirden 5 qyrkúıekke deıin qamaýda bolǵan merzimi (ár kúnge aıyppuldan 4 AEK kóleminde shegeriledi, barlyǵy 147 kún) aıyppul kólemi 1 mln 715,196 myń teńgege tómendetildi.
Q.Muqanovty qamaýda ustaý túrindegi bultartpaý sharasy úkim zańdy kúshine engenge deıin eshqaıda ketpeý týraly qolhat berýmen ózgertilip, sot zalynan bosatyldy.
Sondaı-aq sottalýshy polıtsııa podpolkovnıgi sheninen aıyryldy. Ol 7 mln teńge aıyppuldy sot úkimi kúshine engennen keıin bir aı merzim ishinde tóleýi tıis.
Eske sala keteıik, budan buryn Oral qalasy kóshi-qon polıtsııasynyń bastyǵy para aldy degen kúdikke ilingenin jazǵan bolatynbyz.