Oralda para alǵan polıtsııa qyzmetkeri úsh jylǵa sottaldy
ORAL. QazAqparat - Oral qalasynda para alǵan polıtsııa qyzmetkeri úsh jylǵa bas bostandyǵynan aıyryldy, dep habarlaıdy «QazAqparat» tilshisi.
Oral qalalyq sotynyń úkimimen Halel Sýgýrov QR QK 190-baby 3-bólimi 2-tarmaǵyna sáıkes úsh jylǵa bas bostandyǵynan aıyryldy. Sybaılas jemqorlyqqa jol bergen burynǵy polıtsııa qyzmetkeriniń qolyna sot zalynda kisen salyndy. Sýdıa Naılıa Júnisova, sondaı-aq H.Sýgýrov polıtsııa kapıtany sheninen aıyrylǵanyn, jeke múlki tárkilenip, budan bylaı memlekettik qyzmetke ómir boıyna ornalasa almaıtynyn jetkizdi.
Sot talqysynda belgili bolǵanyndaı, ótken jylǵy 1 qazanda saǵat 14.00-de sybaılas jemqorlyqqa qarsy is-qımyl ulttyq bıýrosy BQO boıynsha departamenti men BQO ishki ister departamenti ózindik qaýipsizdik basqarmasynyń qyzmetkerleri Oral qalalyq ishki ister basqarmasy krımınaldyq polıtsııa bóliminiń jedel ýákili, polıtsııa kapıtany H.Sýgýrovty para alý kezinde qolǵa túsirgen bolatyn. Ol qalalyq ishki ister basqarmasynyń ákimshilik ǵımaraty janynda 1992 jylǵy R. degen azamattan qylmystyq isti toqtatýǵa yqpal etemin degen oımen ári alaıaqtyq jolmen 50 myń teńge para almaq bolǵan. Atalǵan derek boıynsha tergeý amaldary júrgizildi. H.Sýgýrovtan eshqaıda ketpeý jóninde qolhat alynyp, bultartpaý sharasy qoldanylǵan edi. 1983 jyly dúnıege kelgen H.Sýgýrov ishki ister organyna 2009 jyldyń aqpan aıynda ornalasyp, jedel ýákil laýazymyna 2012 jyldyń jeltoqsan aıynda taǵaıyndalǵan.
Oral qalalyq ishki ister basqarmasynyń baspasóz qyzmetkeri Gúlaman Ismaǵulovanyń aıtýynsha, ashyq sot otyrysyna tártip saqshylary da qatysty.
Sot protsesi aıaqtalǵan soń, Oral qalalyq ishki ister basqarmasy kadr qyzmeti bóliminiń bastyǵy, polıtsııa maıory Samıǵolla Abdrahmanov jeke quram aldynda sóz sóılep, mundaı jaǵdaıdyń ózgelerge sabaq bolýy tıistigin, bolashaqta zańǵa qaıshy teris qylyqtarǵa jol bermeý kerektigin eskertti.
