Oralda para alǵan basqarmanyń burynǵy basshysyna 23,6 mln teńge aıyppul salyndy

ORAL. QazAqparat – Oral qalalyq sotynda Oral qalasy memlekettik kirister basqarmasynyń burynǵy basshysy Nurlan Alhıevke qatysty úkim shyqty, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, N.Alhıev QR QK 366-baby 2-bóligine sáıkes aıypty dep tanylyp, oǵan paranyń 55 eselengen kóleminde, ıaǵnı 23 mln 650 myń teńge kóleminde aıyppul salyndy.

Ol sonymen qatar memlekettik qyzmette, sotta, jergilikti ózin-ózi basqarý organdarynda qyzmet atqarý quqyǵynan ómir boıyna aıyryldy.

Sot talqysynda málim bolǵanyndaı, bıylǵy 18 qańtarda QR Qarjy mınıstrligi Memlekettik kirister komıtetinen Oral qalasy memlekettik kirister basqarmasy men «SaýdaEt» JShS-yna atalǵan seriktestikke qatysty kameraldyq baqylaý nátıjeleri boıynsha anyqtalǵan buzýshylyqtar jóninde habarlama jiberilgen.

N.Alhıev JShS quryltaıshysy A.Sletadan seriktestiktiń banktik shoty boıynsha shyǵys operatsııalaryn toqtatý jónindegi shekteý sharalaryn alyp tastaý úshin 1 myń AQSh dollary kóleminde para talap etken. Sleta sol kúni 430 myń teńge bergen.

Birneshe kún ótkennen keıin N.Alhıev atalǵan seriktestiktiń «Sleta A.A.» jeke kásipkerliginiń 2019-2020 jyldardaǵy ónim jetkizýshisi bolǵandyqtan, shekteýlerdi alyp tastaý ózin jaýapkershilikke tartýǵa ákelip soǵatynyn túsingen. Naýryz aıynyń ortasynda ol Sletaǵa shekteýlerdi alyp tastaı almaıtynyn, sondyqtan 430 myń teńge kólemindegi parany keri qaıtaratynyn aıtqan.

N.Alhıev 16 naýryzda 1 myń AQSh dollaryn keri qaıtarǵannan keıin BQO boıynsha sybaılas jemqorlyqqa qarsy qyzmet qyzmetkerleriniń qolyna túsken.

Sot úkimi kúshine engen joq.

Eske sala keteıik, budan buryn BQO densaýlyq saqtaý basqarmasynyń burynǵy basshysy 7,8 mln teńge para alǵany úshin sottalǵanyn jazǵan bolatynbyz.