Oralda óz kompanııasynan 2,2 mln AQSh dollaryn jymqyrǵan kásipker sottaldy
ORAL. KAZINFORM — Oral qalalyq sotynda asa iri mólsherde alaıaqtyq jasaǵan kásipkerge qatysty QR QK-niń 190-baby 4-bóliginiń 2) tarmaǵyna sáıkes úkim shyqty.
BQO sotynyń baspasóz qyzmetinen málim etkenindeı, sottalýshy Aqsaı qalasynda «Karachaganak Support Service» (KSS) JShS-n tirkep, onyń jalǵyz quryltaıshysy ári basshysy bolǵan.
Keıin ol jarǵylyq kapıtaldaǵy úlesterdi qyzmetkerler arasynda qaıta bólgenimen, seriktestiktiń qyzmetin bıznes-menedjer laýazymynda is júzinde baqylaýdy jalǵastyrǵan.
AQSh aýmaǵynda júrgen kásipker kásiporynnyń aqshalaı qarajatyn jymqyrý josparyn qurǵan. «KSS» JShS-niń jańa dırektoryn aldap, «TeńizShevroıl» JShS-men kelisimshartty uzartý úshin jabdyq satyp alý qajettigi týraly kórineý jalǵan aqparat bergen. Qazaqstan Respýblıkasynyń valıýtalyq baqylaý talaptaryn aınalyp ótý úshin ol basshyny mámilelerdi paıyzsyz qaryz túrinde rásimdeýge kóndirgen.
Nátıjesinde «KSS» JShS-niń shottarynan óziniń baqylaýyndaǵy amerıkalyq «KSS Charlotte LLC» kompanııasynyń shotyna birneshe transhpen jalpy somasy 2,2 mln AQSh dollary, ıaǵnı 948 mln 337 myń teńge aýdarylǵan.
Sot kásipkerdi asa iri mólsherdegi alaıaqtyqty jasaǵany úshin kináli dep tanyp, oǵan 8 jyl merzimge bas bostandyǵynan aıyrý jazasyn taǵaıyndady. Degenmen budan burynǵy Atyraý qalasy № 2 sotynyń 2025 jylǵy 24 shildedegi úkimin eskere otyryp, jeńilirek jazany qatańyraq jazaǵa sińirý arqyly sottalýshyǵa túpkilikti 10 jyl merzimge bas bostandyǵynan aıyrý jazasy kesildi. Jazany qaýipsizdigi ortasha qylmystyq-atqarý júıesi mekemesinde óteý belgilendi. Sonymen qatar ol 3 jyl merzimge kommertsııalyq kásiporyndarda basshylyq laýazymdardy atqarý quqyǵynan aıyryldy jáne qylmystyq jolmen tabylǵan múlki tárkilendi.
Jábirlenýshi taraptyń azamattyq talaby tolyq kólemde qanaǵattandyryldy. Sottalýshydan «KSS» JShS-niń paıdasyna 2,2 mln AQSh dollary (948 mln 337 myń teńge) mólsherinde múliktik zııan jáne memlekettik baj óndirildi.
Azamattyq talapty qamtamasyz etý maqsatynda kásipkerdiń jáne onyń baqylaýyndaǵy sheteldik kompanııanyń banktik shottaryna salynǵan tyıym kúshinde qaldyryldy.
Úkim zańdy kúshine engen joq.
Eske sala keteıik, budan buryn BQO-nyń eki turǵyny jalǵan operatsııalar arqyly memleketke 250 mln-ǵa jýyq teńge zalal keltirgenin jazǵan edik.
