Oralda oıyn alańynda 7 jasar bala saýsaǵyn kesip aldy
«Ádildik joly» RQB ókili Baýyrjan Ahmetjannyń Facebook paraqshasynan málim bolǵandaı, oqıǵa 6 sáýir kúni «Sarytaý» shaǵynaýdany M.Móńkeuly kóshesinde ornalasqan oıyn alańynda bolǵan.
Onyń aıtýynsha, jeti jasar er bala shynashaǵynyń jartysynan aıyrylǵan. Syrǵanaqtan túskende, qańyltyr men aǵashtyń ortasyna saýsaǵy qysylyp qalǵan.
Oblystyq kópbeıindi balalar aýrýhanasy «Oń qoldyń besinshi saýsaǵynyń jaraqattan keıingi ampýtatsııasy» degen dıagnoz qoıǵan.
«18 sáýirde balanyń anasy bizge aryzben keldi. Baryp qarasaq, syrǵanaqtyń qańyltyrynyń astyndaǵy temir tireýishter ornynan qozǵalyp, bort pen qańyltyr arasy saýsaq sııatyndaı mólsherge ashylǵan. Atalmysh keshen 53,4 mln teńgege salynyp, Zachagan kenti ákimdigi 2020 jylǵy 26 mamyrda merdiger mekeme «Kazakhstan GIGA Trade» JShS-nen balansqa alǵan. Alaıda kepildik merzimi tek eki jyl eken. Biz osy derek boıynsha QR QK 306-babyna (tutynýshylar ómiriniń nemese densaýlyǵynyń qaýipsizdigi talaptaryna saı kelmeıtin taýarlardy shyǵarý nemese satý, jumystardy oryndaý, eger bul is-áreketter abaısyzda adamnyń densaýlyǵyna zııan keltirýge ákep soqsa jáne jas balalarǵa arnalǵan taýarlarǵa, jumystarǵa qatysty jasalsa) sáıkes is qozǵaý týraly aryzdy BQO prokýratýrasyna joldadyq. Ákimdiktiń kemshiligi balansynda turǵan nysandy baqylaýsyz, ıesiz qaldyrýynda, olardy tipti jóndemeıdi. Ata-analar da bala oınaıtyn jerdi muqııat qaraý kerek edi», dedi B.Ahmetjan.
Ókinishtisi, 2022 jyly oblysta osyndaı tórt derek tirkelse, sonyń bireýinde bir jasóspirim fýtbol qaqpasynyń astynda qaza tapty.
B.Ahmetjan osy másele boıynsha Oral qalasy ákimdigi men QR Densaýlyq saqtaý mınıstrligine suraý salǵanyn jetkizdi.
BQO densaýlyq saqtaý basqarmasy baspasóz qyzmetiniń naqtylaýynsha, 2016 jylǵy bala 6 sáýir kúni jedel járdemmen oblystyq balalar aýrýhanasyna jetkizilgen. Dıagnozy – shynashaǵy kesilgen. Ota jasalǵan bala 10 sáýirde aýrýhanadan shyqty.
Eske sala keteıik, budan buryn Oralda ústine fýtbol qaqpasy qulaǵan 11 jasar balanyń kóz jumǵanyn jazǵan bolatynbyz.
