Oralda ótkizilgen dóńgelek ústel otyrysynda Elbasy Joldaýyna baılanysty maqsat-mindetter túsindirildi
ORAL. Qazannyń 18-i. QazAqparat /Eljan Eraly/ - Oralda Elbasy Nursultan Nazarbaevtyń bıylǵy Joldaýynda aıtylǵan mindetterdi talqylaýǵa arnalǵan dóńgelek ústel otyrysy ótti.
Oǵan qatysqan «Ult taǵdyry» qozǵalysynyń jetekshisi Dos Kóshimniń pikirinshe, bıylǵy Joldaýdyń bir ereksheligi - aldaǵy on jyldaǵy baǵyt-baǵdarymyzdy aıqyndap, naqty mindetterdi kórsetip berýinde. Sondyqtan ony elimizdegi árbir azamattyń bilýi - ózi úshin mańyzdy. «Joldaýda kórsetilgen mindetterdiń biri quqyq qorǵaý salasyn reformalaý bolatyn. Eki aıdan beri osy baǵytta naqty jumystar bastaldy. Reformanyń eń birinshi maqsaty jumystyń tıimdiligin artyrý bolsa, ekinshiden, jazany izgilendirý. Reforma aıasynda aldaǵy jyly zańdarǵa ózgerister engiziledi. Jazalardy jeńildetý, ıaǵnı izgilendirý jolǵa qoıylatyn bolady», - dedi ol.
Belgili saıasatker odan ári Joldaýdaǵy ekonomıkalyq máselelerge keńinen toqtaldy. «El birligi doktrınasynyń» ult janashyrlarymen birigip jasalǵan nusqasyn tanystyra ketti. Bul jıynǵa «Batys Qazaqstan oblysynyń oralmandary» qoǵamdyq birlestiginiń tóraǵasy Jáńgir Ahmetzada, «Batys Alash» qoǵamdyq birlestiginiń tóraǵasy Talǵat Qataýov jáne basqa da azamattar qatysty. Olar ult, til taǵdyryna qatysty suraqtar qoıyp, ózara oı-pikir almasty.
