Oralda ótken respýblıkalyq aıtysta júlde aqyndarǵa teń bólindi
Oral qalasyndaǵy «Atameken» óner ordasynda «Azattyqtyń aq tańy» atty respýblıkalyq aqyndar aıtysy máresine jetti, dep habarlaıdy Kazinform.
BQO ákimdigi, oblystyq Mádenıet, tilderdi damytý jáne arhıv isi basqarmasynyń qoldaýymen Qadyr Myrza Álı atyndaǵy oblystyq mádenıet jáne óner ortalyǵy jáne «Aıtys aqyndary men jyrshy-termeshilerdiń halyqaralyq odaǵy» BQO fılıaly birlese uıymdastyrǵan jyr dodasyna Qazaqstannyń óńirlerinen 16 aqyn qatysyp, baq synady.
Aıtys aldynda «Otan» ordeniniń ıegeri, QR eńbek sińirgen qaıratkeri, qazylar alqasynyń tóraǵasy Júrsin Erman aqyndarǵa aq batasyn berip, sáttilik tiledi.
Aıtysty júrgizgen Qazaqstannyń eńbek sińirgen qaıratkeri, «Qurmet» ordeniniń ıegeri, Májilis depýtaty Amanjol Áltaıd atap ótkendeı, memleketiniń mereıin qalaıtyn, Otan dese, júregi lúpildeıtin ár azamatqa Táýelsizdikten qasterli, odan qundy eshteńe joq.
«Osy aıtystyń alyp dalamyzdyń batystaǵy baıtaq ólkesi – jaısań Jaıyqtyń jaǵasynda, ordaly Oraldyń tórinde ótýiniń úlken sebebi bar. Jyl basynan beri qazaq dalasynyń túkpir-túkpirinde aıtystyń nebir alamandar ótkizildi. Sol dúbirli dodalarda Jaıyqtyń jaǵasynan shyqqan Baýyrjan Halıolla bastaǵan Batys Qazaqstan oblysy aqyndarynyń mereıi ústem, eńsesi bıik boldy. Bir ǵana mysal, «Asyl dombyra» aıtysynyń qorytyndy esebinde Batys Qazaqstan komandasynyń bas báıge ıelenýi osyǵan dálel. Sondyqtan jyldyń qorytyndy aıtysyn Oralda ótkizýdi jón kórdik», -dedi A.Áltaı.
Sondaı-aq aıtysqa kelgen oblys ákiminiń orynbasary Baqytjan Narymbetov sóz aldy.
«Elimiz egemendik alyp, eńsesin tiktegen 32 jyl ishinde qol jetkizgen jetistikterimiz barshylyq. Memleket deńgeıinde júzege asyp jatqan tarıhı sheshimder men tabysty qadamdar keýdesinde jany, boıynda qany bar kez kelgen qandasymyzdy, otandasymyzdy oılandyryp, tolǵandyrary anyq. Memleketimizdiń baǵyndyrýy tıis asqaq armany men uly murattaryn respýblıkamyzdyń belgili aqyndary halyqtyń júregine jetkizedi dep senemiz», - dedi B.Narymbetov.
Sahna shymyldyǵyn kópten beri kórinbeı ketken atyraýlyq Shynarbek Qabıev pen Arqalyq qalasynan kelgen aıtystyń aqtańgeri Aıbek Qalıev ashty. «Bostandyqtan asatyn baqyt bar ma, Azattyqtan asatyn baılyq bar ma!» degen qos aqynnyń sózin batysqazaqstandyq Aınabek Bısenǵalıev pen almatylyq Shuǵaıyp Sezimhan jalǵastyryp, el esinde qalýy tıis ult batyrlaryna qurmet kórsetý kerektigin atap ótti.
Shymkenttik Birjan Baıtýov pen aqtóbelik Qaınar Alagózov naǵyz qurdastarǵa tán ázil-qaljyńmen sóz talastyra bildi. Qaraǵandylyq Aıtbaı Jumaǵulov pen batysqazaqstandyq Baýyrjan Shırmedınuly eldik pen erlik máselelerine kóbirek bet burdy. Mańǵystaýlyq Abaı Jolmaǵambetovpen sahnaǵa kóterilgen batysqazaqstandyq Meıirman Shákenov, ásirese aýyldarda jol qatynasy, adamdardyń qalaǵa kóshýi syndy túıtkildi jaıttardyń sheshilmeı otyrǵanyn tilge tıek etti. Batysqazaqstandyq Muradym Mırlanov pen aqtóbelik Juldyz Qojabekova qyz ben jigittiń aıtysyn tartymdy jasady deýge bolady.
BQO-nyń taǵy bir ókili Talǵat Myqı men atyraýlyq Shalqarbaı Іzbasarov táýelsizdik, el men jer qadiri týraly óleń shýmaqtaryn qurdastyq ázildermen tuzdyqtap otyrdy. Dodanyń eń sońynda shyqqan qyzylordalyq Muhtar Nııazov pen batysqazaqstandyq Jansaıa Mýsına taqyrypty tereń tolǵap, arasynda qaljyń qosyp, jurtshylyqty bir serpiltip tastady.
Qazylar alqasynyń sheshimimen aıtysqa qatysqan aqyndardyń bárine BQO ákiminiń alǵyshaty tapsyrylyp, 500 myń teńgeden syıaqy berildi.
Sonymen qatar qyryq jyl boıy aıtysty órge súırep kele jatqan Júrsin Ermanǵa da Aq Jaıyq eli atynan erekshe qurmet kórsetildi.
