Oralda ótken grand baldan túsken qarjy naýqas balalardy emdeýge jumsalmaq
Onda oblys ákimi Altaı Kólginovtiń atap ótkenindeı, Elbasynyń «Rýhanı jańǵyrý» baǵdarlamasy aıasynda óńirde jańa jobalar qolǵa alynyp, sharalar uıymdastyrylyp jatsa, sonyń biri - osy qaıyrymdylyq baly. Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda alda turǵan maqsat-mindetterdi kórsetip bergeni belgili. Sonyń ishinde týǵan jer men elge qurmettiń orny erekshe. Osy oraıda grand balǵa qatysýshy 100 debıýtant júz otbasyǵa kómek kórsetip, syılyqtar úılestirdi. Qytaıda ótken «I am singer» jobasynyń júldegeri, qazaqtyń daryndy uly Dımash Qudaıbergen qaladaǵy áleýmettik qyzmet kórsetý mekemesine baryp, qamkóńil qarııalarmen kezdesti. Tamyljyta án salyp, kóńilderin kóterdi. Al akter Asylhan Tólepov jalǵyz basty qarııanyń aýlasyn tazalap berdi. Aq Jaıyq óńirine kelgen ózge de qonaqtar osyndaı baǵyttaǵy qaıyrymdylyq kómekterin aıamady. «Bul - úlgi bolarlyq is. Bizdiń rýhanı jańǵyrý jolyndaǵy birligimiz ben yntymaǵymyzdyń kórinisi. Osy sharanyń ótýine uıytqy bolǵan uıymdastyrýshylarǵa, ásirese, Alpamys Sharımovke alǵysymdy aıtqym keledi. Ol qaıyrymdylyq grand balynyń osylaı keremet ótýine uıytqy bolyp, óner juldyzdarynyń atsalysýyn qamtamasyz etti. Sonymen qatar bir aı boıy arnaıy daıyndyqtan ótken 100 qatysýshyǵa rızashylyǵymdy bildirgim keledi», - dedi óńir basshysy.
Qaıyrymdylyq keshti Asylhan Tólepov, Gúlnár Selbaeva, Nurbıgúl Egizova men Sergeı Jýja júrgizip, bal bıshilerin ortaǵa shaqyrdy. Olardy keshtiń basty qonaǵy, mahabbattary arqyly kópshilikke aýyr derttiń ózin jeńýge bolatyndyǵyn kórsetken qos ǵashyq Marlen Nurǵasenov pen Ánel Muratova bastap shyqty. Ózderiniń sózine qaraǵanda, olardyń dostyǵy 16 jastan bastalǵan. Ekeýi Atyraý oblysy Qulsary qalasyndaǵy bir mektepte oqyǵan. Keıin Marlen toǵyzynshy synypty bitirip, Aqtóbe qalasyndaǵy kolledjge oqýǵa túsedi de, Ánel Qulsaryda oqýyn jalǵastyrady. Alaıda boıjetken 2009 jyly ókpesine salqyn tıgizip, ota jasatýǵa týra keledi. Ota Qaraǵandyda jasalatyn bolǵandyqtan, boıjetken Marlenge derti týraly shyndyqty aıtady. Sodan Ánel men anasy poıyzben Qaraǵandyǵa attanady. Poıyz Aqtóbe oblysynyń Qandyaǵash stantsııasyna toqtaǵanda, kýpege Marlen kiredi. Ol Áneldiń anasyna sabaǵynan qashyp ketkenin jáne qandaı jaǵdaıda da Áneldiń janynan tabylatynyn aıtyp, Qaraǵandyǵa birge attanady. Keıin Qaraǵandy qalasynda ýaqytsha jumysqa ornalasady. Jumystan shyǵa salysymen aýrýhanaǵa baryp, ǵashyǵynyń janynan bir eli alystamaıdy. Al Áneldiń bir ókpesi ota arqyly alynyp tastalǵandyqtan, ottegi balonynsyz júrý múmkin bolmaı qalady. Sol sátterde de bozbala ottegi ballonyn birge tasyp, Ánelden jyly sózin aıamaı, ómir súrý úshin talpyný qajettigin úıretedi. Osylaı jeti jyl boıy ómiri qyl ústinde turǵan Ánel Muratova Marlendeı azamattyń mahabbaty men qoldaýynyń arqasynda dertti jeńip shyqqan bolatyn.
«Budan eki-úsh jyl buryn dárigerler ómir súrýime 30 paıyz ǵana múmkindik bar dep edi. Allanyń qalaýymen, Marlenniń maǵan degen mahabbatynyń arqasynda osynda kelip turmyn. Ómirde qaıyrymdy adamdar kóbeıip, jaqsylyq tolastamasyn. Soǵan bárimiz úles qosa bereıik», - dedi Ánel Muratova.
Bal kóılegin kıgen qyzdar men smokıng kıip, symdaı tizilgen jigitter fın polkasyn, orystyń kadrılin, Italııanyń pavanasyn, Shámshiniń valsin myń burala bılep, kórermenderge erekshe áser syılady. Olarǵa osy qaıyrymdylyq sharasyna oraı «Daryn» memlekettik jastar syılyǵynyń ıegeri, baletmeıster Dosjan Tabyldy men M.Ótemisov atyndaǵy Batys Qazaqstan memlekettik ýnıversıtetiniń bas baletmeısteri, horeograf Qarlyǵash Qadyrbekova bir aı boıy arnaıy dáris bergen bolatyn.
Shara barysynda elge tanymal estrada ánshileri óz ónerlerin kórsetti. Ásirese, Gúlnur Orazymbetovanyń «Kókke órle», Erke Esmahannyń «Qaıda», Dımash Qudaıbergenniń «Daıdıdaý» ánderi aıryqsha qoshemetke ıe boldy. Áýelete án salǵan soń óner áleminiń juldyzdary Aq Jaıyq jurtshylyǵyna aq jarma tilegin arnady.
Aıta keteıik, bıyl úshinshi ret uıymdastyrylǵan qaıyrymdylyq balynyń bıleti 20 myń teńgeden satylǵan. Jınalǵan qarjy sal aýrýyna shaldyqqan náresteler men Ánel Muratovanyń emine jumsalmaq. 
