Oralda otbasylyq ansamblder baıqaýy márege jetti
ORAL. QazAqparat - Oblystyq qazaq drama teatrynda «Óner shamshyraǵy» otbasylyq ansamblder baıqaýy márege jetti, dep habarlaıdy «QazAqparat» tilshisi.
Elbasynyń «Bolashaqqa baǵdar: rýhanı jańǵyrý» baǵdarlamasy aıasynda otbasy mártebesin arttyryp, olarǵa qoldaý kórsetý, halqymyzdyń dástúrli ónerin damytý maqsatynda oblystyq halyq shyǵarmashylyǵy ortalyǵy uıymdastyrǵan óner saıysyna 10 otbasylyq ansambl qatysyp, baq synady.
Baıqaý barysynda otbasylyq ansamblder músheleri ózderin ár qyrynan tanytty, ıaǵnı biri qazaqtyń qasıetti qara dombyrasymen sahnaǵa shyqsa, ekinshisi estradalyq janr, baıandy qolǵa aldy. Úshinshisi ónerin bımen órip, kópshilik qoshemetine bólendi.
Óner dodasyna óńirge tanymal ánshi-termeshi, QR halyq aǵartý isiniń úzdigi, «Eren eńbegi úshin» medaliniń ıegeri, halyqtyq Qabıevter otbasylyq ansambli jáne «Qyz Jibek» termeshiler ansambliniń jetekshisi Baıan Qabıeva bastaǵan qazylar tórelik etti. «Elimizde «Rýhanı jańǵyrý» baǵdarlamasyna sáıkes kóptegen jobalar qolǵa alynýda. Sonyń ishinde dástúrli ónerimizdi damytýǵa mol múmkindik týyp otyr. Osy oraıda ózindik qoltańbasy bar otbasylyq ansamblderdiń qatary kóbeıe berse, nur ústine nur bolar edi», dedi B.Qabıeva.
Saıys qorytyndysynda qazynaly qazaq ónerin joǵaltpaı, ulttyq ónerdi atadan balaǵa mıras etip kele jatqan otbasylyq ansambldiń eń júırikteri anyqtalyp, olar gala-kontsertte sahnaǵa shyqty. Atap aıtqanda, Jánibek aýdanynan kelgen Kárimovter otbasylyq ansambli bas júldeni jeńip alsa, Hasanovtar (Qaztalov) birinshi, Sısenovter (Zelenov) men Baıtemirovter (Qaratóbe) ekinshi, Qabıevter (Terekti), Baıǵalıevter (Shyńǵyrlaý) jáne Botashevtar (Bórli) úshinshi orynǵa ıe boldy. Olardyń bári de dıplomdarmen, alǵys hattarmen, syılyqtarmen marapattaldy.
