Oralda Otan qorǵaýshylar kúnin Ulttyq ulan jaýyngerleri atap ótti
«Ashyq esik» kúnine Ekinshi dúnıejúzilik jáne tájik-aýǵan soǵysynyń ardagerleri, ishki ister organdarynyń qyzmetkerleri, oqýshylar, Oral garnızony jáne «Batys» óńirlik qolbasshylyǵy men 5517-áskerı bóliminiń Ulttyq ulan jaýyngerleri qatysty.
QR Ulttyq ulany «Batys» óńirlik qolbasshylyǵy baspasóz qyzmetinen túsken málimetke qaraǵanda, saltanatty sharaǵa qatysýshylardy BQO ákiminiń orynbasary Ǵabıdolla Ospanqulov quttyqtap, Qazaqstan Qarýly kúshterin qurý men qalyptastyrýda Elbasy N.Á.Nazarbaevtyń basshylyǵymen ulan-ǵaıyr jumystar atqarylǵanyn, aǵa býynnyń erlik isterin búgingi Otan qorǵaýshylar abyroımen jalǵastyryp kele jatqanyn jetkizdi.
Budan keıin qoǵamdyq tártipti saqtaý, azamattardyń qaýipsizdigin qamtamasyz etýde óz mindetterin múltiksiz atqaryp júrgen bir top áskerı qyzmetkerge І, ІІ, ІІІ dárejeli «Minsiz qyzmeti úshin» medaldary men oblys ákiminiń alǵys hattary tabys etildi.
«Batys» óńirlik qolbasshysy, general-maıor Álibek Serálıev el qorǵaǵan erlerdiń esimi máńgi umytylmaıtynyn aıtyp, ardagerler men áskerı qyzmetkerlerge izgi tilegin bildirdi.
Uly Otan soǵysynyń ardageri, Máskeýdegi 1945 jylǵy Jeńis sherýine qatysqan doǵarystaǵy polkovnık Ivan Gapıch Otan aldyndaǵy boryshyn qaltqysyz atqaryp júrgen jaýyngerlerge tabys tiledi.
Shara barysynda meımandar áskerı bólimniń tehnıkalary men qarý-jaraqtaryn kórip, sarbazdar botqasynan dám tatty. Ásirese, oqýshylar RPG-7V granata atqyshy, Kalashnıkov avtomaty men pýlemeti, Dragýnov mergen vıntovkasy, mınomet sekildi qarý-jaraqtardy alǵash ret kórip, tánti boldy. Sondaı-aq 5517-áskerı bóliminiń janynan qurylǵan «Jas búrkit» áskerı-patrıottyq klýbynyń qoıan-qoltyq urysyn tamashalady. Mundaı klýbtar respýblıka boıynsha kez kelgen mektepte 3-11 synyp oqýshylary arasynda jasaqtalyp, jumys jasaıdy. Onyń basty maqsaty - oqýshylardy Otan súıgishtikke, patrıotızmge tárbıeleý, ata-babanyń erlik jolyn uǵyndyrý, psıhologııalyq jáne dene daıyndyǵy jaǵynan shyńdaý.
Áskerı bólim sarbazdary sap túzep, saltanatty sherý jasady. Sodan keıin dala ashanasy janynda maıdangerlerdiń qatysymen áserli áńgime shertilip, áskerı ánder shyrqaldy. Merekelik kontsert basqa da mádenı-sporttyq sharalarǵa ulasty.
