Oralda otalǵan aǵashtardyń ornyna ótemdik kóshetter otyrǵyzý nátıjesi nege kóńil kónshitpeıdi

«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıevtiń málim etkenindeı, jýyrda ekologtar Zachagan kentindegi Oral-Saratov trassasy boıynda «Merkýrıı» saýda úıi (qazir «Master dom») mańyndaǵy ótemdik kóshetter otyrǵyzylǵan alqapty tekserip shyqqan bolatyn.

- Egilgen tal-terekterdiń bári qýrap ketken. Sýarylmaıtyn mań dalada aǵash otyrǵyzý jónindegi sheshimdi kim qabyldaǵan, bul jergilikti atqarýshy organdar tarapynan jasyl jelekke salǵyrt kózqarastyń nátıjesi dep bilemiz. Qazirgi kezde «Aqjaıyq» shaǵynaýdanyn Oral qalasymen jalǵastyratyn jańa kópir qurylysy bastalyp jatqany belgili. Soǵan oraı 1 myńnan astam aǵash kesilmekshi. Sonyń ornyna 10 myńnan astam ótemdik kóshet otyrǵyzylýy kerek. Saýda úıin salǵan kezdegi jaǵdaıdyń kebin kımes úshin biz buǵan qoǵamdyq baqylaý ornatýdamyz. Shyn mánisinde naqty joba jasap, ony durystap júzege asyra bilse, ótemdik kóshetter esebinen Oral qalasyn kógaldandyrýǵa bolady, - deıdi D.Sarıev.

Osy máselege baılanysty Kazinform tilshisi Oral qalasy ákimdigine arnaıy saýal joldaǵan edi.

Qala ákimdiginen túsken málimetke qaraǵanda, burynǵy «Merkýrıı» saýda úıi aýmaǵynda kógaldandyrý aıasynda aǵash kóshetteri otyrǵyzylǵan. Alaıda qys-kóktem mezgilderinde taýdan túsetin sý aǵyny saldarynan aýmaqtyń bir bóligi shaıylyp, kóshetterdiń birqatary saqtalmaǵan.

Qazirgi ýaqytta kógaldandyrý jumystaryn júıeleý maqsatynda Derkól jáne Zachagan kentteri, sondaı-aq qala aýmaǵynda naqty ýchaskeler belgilenip jatyr. Aldaǵy ýaqytta kóshetter josparly túrde otyrǵyzylyp, olardyń kútip-ustalýy men jaǵdaıyna tıisti baqylaý júrgiziledi.

Ekinshi másele, «Aqjaıyq» shaǵynaýdanymen jalǵastyratyn «Shaǵan ózeni arqyly ótetin kópir qurylysy» jobasyn iske asyrý aýmaǵynda jalpy sany 1 150 jasyl jelek, sonyń ishinde aǵashtar men butalar bar. Bul málimet jasyl jelekterdi esepke alý aktisine sáıkes kórsetilgen.

Qazirgi tańda nysan aýmaǵynda qurylysqa daıyndyq jumystarynyń negizgi bóligi aıaqtaldy. Jumys júrgiziletin aýmaqta kesilmegen shamamen 100 jasyl jelek qaldy. Onyń basym bóligi – butalar, sondaı-aq kólemi ár túrli aǵashtar bar.

- Qoldanystaǵy talaptarǵa sáıkes kesilgen ár aǵashtyń ornyna 10 ótemdik kóshet otyrǵyzý jumystary júrgiziledi. Osyǵan baılanysty jalpy sany 1 150 jasyl jelekti eskere otyryp, shamamen 11 500 dana ótemdik kóshet otyrǵyzý josparlanýda. Ótemdik kóshet otyrǵyzylatyn oryn aıqyndalý ústinde. Aldaǵy ýaqytta bul jumystardy Oral qalasyndaǵy «Aqjaıyq» turǵyn alabyn damytýǵa baǵyttalǵan jańa jobalar aıasynda júzege asyrý múmkindigi qarastyrylýda. Ótemdik kóshet otyrǵyzylatyn naqty oryn men jumystardyń merzimi belgilengen tártippen qosymsha anyqtalyp, tıisti aqparat beriledi, - delingen resmı jaýapta.

Eske sala keteıik, budan buryn Batys Qazaqstanda egilgen mıllıondaǵan aǵashtyń nege jersinbeı qýrap ketetinin jazǵan edik.

Sondaı-aq ekolog ár qalada kólemi 30 gektar bir park salynsa, artyq etpeıtini jóninde áńgimelep berdi.