Oralda órtenip ketken saıajaıdyń ornynan adam súıekteri tabyldy
ORAL. QazAqparat - Batys Qazaqstan oblysynda jańa jyldyq demalys kúnderi birneshe órt oqıǵasy tirkeldi, dep habarlaıdy «QazAqparat» tilshisi.
BQO TJ departamentinen túsken málimetke qaraǵanda, 1 qańtar kúni Oraldaǵy 2-saıajaı aýmaǵy «Avtomobılıst» saıajaı qoǵamdastyǵyndaǵy úı túgeldeı órtenip ketken. Órttiń jalpy aýdany 20 sharshy metrdi qamtyǵan. Oqıǵa ornynan órt sóndirýshiler adam súıekteriniń bólikterin tapqan.
Oral qalalyq ishki ister basqarmasy bastyǵynyń birinshi orynbasary Nurlan Bısenovtiń aıtýynsha, súıek qaldyqtary saraptamaǵa jiberilgen. Ázirge ol týraly naqty aıtý qıyn.
31 jeltoqsan jáne 1 qańtar kúni Oralda birneshe janý oqıǵalary tirkelip, al Bórli aýdany Jarsýat aýylynda úıýli turǵan pishen otqa orandy.
Aıta keteıik, jańa jyldyq demalys kúnderi departamenttiń órt sóndirý jáne apattyq-qutqarý jumystary qyzmeti kúsheıtilgen qyzmet túrine (jeke quramnan 230 adam jáne 59 tehnıka) kóshirilip, jumys jasady.
