Oralda órtengen úıden ottegi ballony shyǵaryldy
ORAL. QazAqparat – Oralda órtengen úıden ottegi ballony shyǵaryldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, 18 qazan kúni saǵat 01.28-de A.Taımanov kóshesi 58-mekenjaıynda órt shyqqany jóninde habar túsken.
Órt aýmaǵy 80 sharshy metrdi qamtydy.
«Tilsiz jaý» departament kúshterimen (14 adam, 4 tehnıka) saǵat 02.07-de aýyzdyqtaldy.
Órt ornynan qutqarýshylar 1 ottegi ballony men 5 syra ydysyn (kega) shyǵaryp úlgerdi.
Zardap shekkender joq.
«Árbir turǵyn qutqarýshylar kelgenge deıin ne isteý kerektigi jónindegi qarapaıym erejeni bilýi tıis. Qazirgi tańda órt qaýipsizdigi boıynsha aqparattar keńinen taratylýda. Departament áleýmettik jelilerde oqytý fılmderi men mýltfılmderdi salýda. Mektepterde órt sóndirýshiler men qutqarýshylardyń qatysýymen sabaqtar ótkizilýde. Eń bastysy, adamdar órt qaýipsizdigi erejesin saqtaı bilse, óz basyna da, ózgege de qaýip tóndirmeıdi», dedi QazAqparat tilshisine departamenttiń zilzala qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıev.
Bıyl 2 qazanǵa deıin oblysta 493 órt (2019 jyly osy merzimde – 419) tirkelse, sonyń 279-y turǵyn úı sektorynda boldy.
Órt saldarynan 5 adam (2019 jyly – 5) kóz jumsa, olardyń bári de mas kúıinde bolǵan. 8 adam (2019 jyly – 7) túrli jaraqat aldy.
Órtten kelgen zalal 134,958 mln teńgege (2019 jyly – 11,923 mln teńge) jetti.
Óńirde 17 orman órti tirkelip, ótken jylǵydan (4) anaǵurlym ósip ketti. Sondaı-aq 67 dala órti (2019 jyly – 0), 348 tabıǵı janý (237) qorshaǵan ortany sharpydy.
Eske sala keteıik, budan buryn Oralda jeke úı órtenip ketkenin jazǵan bolatynbyz.
