Oralda órtengen garaj ornynan úsh adamnyń máıiti tabyldy
BQO TJ departamentiniń baspasóz qyzmeti málim etkendeı, oqıǵa 25 sáýir kúni keshkisin boldy.
«Saǵat 20.58-de A.Qusaıynov kóshesi 3-mekenjaıynda aýmaǵy 30 sharshy metr garaj ben onyń ishindegi «VAZ-2121» (Nıva) avtokóligi otqa orandy. Sodan keıin jalyn jeke turǵyn úıdiń (42 sharshy metr) tóbesin sharpydy. Garajdan úsh adamnyń denesi tabyldy. Sondaı-aq árqaısysynyń syıymdylyǵy 50 lıtr 4 ottegi ballony shyǵaryldy. «Tilsiz jaý» saǵat 21.32-de oqshaýlanyp, 22.02-de aýyzdyqtaldy. Barlyǵy 23 adam (7 tehnıka) jumyldyryldy. Qazirgi kezde órttiń sebebi, keltirilgen shyǵyn, qaıtqan adamdardyń kim ekendigi anyqtalý ústinde», dep habarlady vedomstvodan.
BQO polıtsııa departamenti baspasóz qyzmetiniń naqtylaýynsha, oqıǵa ornynda 20 polıtsııa qyzmetkeri jumys istedi.
Eske sala keteıik, budan buryn Oral qalasynda orman aýmaǵyndaǵy órttiń sóndirilgenin jazǵan bolatynbyz.