Oralda ortalyq saıabaqtaǵy jaǵajaıdyń jabylyp qalǵany ras pa
ORAL. KAZINFORM — Oral qalalyq mádenıet jáne demalys saıabaǵynda jaǵajaıdyń qorshalyp, jabylǵany jóninde áleýmettik jelide aqparat jarııalandy.
Osyǵan baılanysty turǵyndar alańdaýshylyǵyn bildirip, óz pikirlerin jazyp jatyr.
Atalmysh máselege oraı Kazinform tilshisi Oral qalasy ákimdigine arnaıy saýal joldaǵan edi.
Ákimdik málimetine qaraǵanda, atalǵan aýmaqqa kirýdi shekteý týraly sheshim tótenshe jaǵdaılar jónindegi komıssııa otyrysynda qabyldandy. Sebebi bul jer sýǵa túsýge ruqsat etilmegen, jabdyqtalmaǵan aýmaq bolyp sanalady. Soǵan qaramastan, turǵyndar jyl saıyn bul jerde shomylýyn jalǵastyryp keledi, bul azamattardyń ómiri men densaýlyǵyna qaýip tóndiredi.
— Ókinishke qaraı, ótken jyldary osy aýmaqta sýda jazataıym oqıǵalar tirkelgen. Osyǵan baılanysty turǵyndardyń qaýipsizdigin qamtamasyz etý maqsatynda qaýipti aımaqqa qorshaý ornatý jáne kirýdi shekteý týraly sheshim qabyldandy. Sonymen qatar atalǵan aýmaqtyń janynda barlyq qaýipsizdik talaptaryna saı jabdyqtalǵan jeke jaǵajaı jumys isteıdi. Onda demalýshylarǵa qajetti jaǵdaı jasalyp, qaýipsizdik sharalary tolyq qamtamasyz etilgen, — delingen resmı jaýapta.
Qala ákimdiginiń málimeti boıynsha qazirgi tańda shahardaǵy jaǵajaılar tizimi jasalyp jatyr. Jeke jaǵajaılar ótinim bergennen keıin TJ basqarmasy jáne sanıtarııalyq-epıdemıologııalyq stantsııa mamandary baryp tekseredi. Talapqa saı kelgen jaǵajaılarǵa ruqsat beriledi. Tizim osy aıdyń sońyna deıin naqtylanady.
Eske sala keteıik, budan buryn Batys Qazaqstanda shomylýǵa arnalǵan 34 oryn belgilengenin jazǵan edik.
