Oralda ortalyq alańdaǵy sýburqaq nelikten jumys istemeı tur
ORAL. KAZINFORM — Oral qalasynda Tuńǵysh Prezıdent alańynda ornalasqan sýburqaqtyń jaı-kúıi syn kótermeıtini týraly áleýmettik jelide aqparat jarııalandy.
Qala turǵynynyń Instagram áleýmettik jelisinde málim etkenindeı, baspaldaqtar synyp jatyr. Sýburqaq buryn bolǵan, qazir jumys istemeı tur.
— Jańbyrdan keıin sýburqaqqa sý jınalǵan. Sý joq kezde de kórgenmin, qanshama qoqys jatyr, masqara jaǵdaı. Qalanyń jańa aýdanyndaǵy ortalyq alańnyń mundaı kúıge túsýine kim jaýap beredi? — deıdi turǵyn.
Osyǵan oraı Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, qazirgi kezde sýburqaqtyń ishi qoqystan tazalandy.
Sýburqaq bıyl jaz mezgilinde tehnıkalyq aqaýǵa baılanysty isten shyqqan. Mamandardyń tekserý qorytyndysyna sáıkes ony iske qosý úshin jaı ǵana aǵymdaǵy jóndeý jetkiliksiz.
— Nysannyń jumys qabiletin tolyq qalpyna keltirý maqsatynda kúrdeli jóndeý jumystaryn júrgizý qajet. Ol úshin qoldanystaǵy zańnamaǵa sáıkes aldymen jobalyq-smetalyq qujattama ázirlenip, memlekettik saraptamanyń oń qorytyndysy alynýy jáne tıisti qarjy qarastyrylýy tıis. Osy rásimder tolyq aıaqtalǵannan keıin sýburqaqty kúrdeli jóndeý jáne qalpyna keltirý jumystary júrgiziledi, — delingen resmı jaýapta.
Eske sala keteıik, budan buryn Oralda Tuńǵysh Prezıdent alańynyń jeri jalǵa berildi me, sol jóninde ákimdik jaýap bergenin jazǵan edik.
Sondaı-aq Oral turǵyndary polıgon tútininen tynys alý qıyndaǵanyn aıtyp shaǵymdandy.
