Oralda órt sóndirýshiler janǵan garajdan gaz ballonyn shyǵaryp úlgerdi
ORAL. QazAqparat – Oral qalasynda garaj órtenip ketti, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń málim etkenindeı, oqıǵa 17 mamyr kúni saǵat 06.41-de «Fakel» garaj kooperatıvinde boldy.
Osyndaǵy garajdardyń birinde jeke zattar janǵan.
Órt aýmaǵy 15 sharshy metrdi qamtydy.
«Tilsiz jaý» órt sóndirýshilerdiń kúshimen (6 adam, 1 tehnıka) saǵat 07.32-de aýyzdyqtaldy.
Jalyn ishinen gaz ballony shyǵaryldy.
«Turmystyq gaz ballony kómirsýtegi gazymen toltyrylady. Qatty qyzǵan jaǵdaıda gaz ballony jarylyp, adam ómirine qaýip tóndirip, múlikti búldirýi yqtımal. Sondyqtan turǵyndar qarapaıym órt qaýipsizdigi erejelerin saqtap, abaı bolýy tıis», dedi QazAqparat tilshisine E.Tóregeldıev.
Eske sala keteıik, budan buryn Batys Qazaqstanda jazǵy demalys orny órtenip, odan da gaz ballony shyǵarylǵanyn jazǵan bolatynbyz.
