Oralda órt sóndirýshiler jalyn ishinen eki gaz ballonyn alyp shyqty
ORAL. QazAqparat – Oral qalasynda órt sóndirýshiler ot qushaǵynan eki gaz ballonyn alyp shyqty, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń málim etkenindeı, órt 26 sáýir kúni saǵat 03.10-da Ǵ.Toqaı kóshesindegi jeke úıdiń aýlasynda oryn aldy.
Sharýashylyq qurylysy men «VAZ-2104» avtokóligi otqa orandy. Órt aýmaǵy 70 sharshy metrdi qamtydy.
Oqıǵa barysynda turmystyq gaz ballondarynyń jarylýy múmkin edi. Óz bastaryn qaterge tigip, jedel de batyl qımyldaǵan órt sóndirýshiler eki gaz ballonyn ot qushaǵynan alyp shyǵyp, apatqa jol bergen joq.
Órttiń shyǵý sebebi, kináli adamdar, keltirilgen shyǵyn anyqtalý ústinde.
Saǵat 04.46-da aýyzdyqtalǵan órtti sóndirýge 14 adam, 4 tehnıka jumyldyryldy.
«Qazirgideı tótenshe jaǵdaı kezinde turǵyndardan qarapaıym órt qaýipsizdigi erejelerin qatań saqtaýdy ótinemiz», dedi QazAqparat tilshisine E.Tóregeldıev.
Eske sala keteıik, budan buryn Aqsaı qalasynda qatty jeldiń dúkenniń shatyryn julyp áketkenin, Oralda 10-qabattan er adamnyń sekirip ketkenin jazǵan bolatynbyz.
