Oralda órt sóndirýshiler ottyń ortasynan eki gaz ballonyn alyp shyqty
ORAL. QazAqparat – Oralda órt sóndirýshiler ottyń ortasynan eki gaz ballonyn alyp shyqty, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıev málim etkendeı, oqıǵa búgin 2-saıajaı qoǵamdastyǵy aýmaǵynda oryn aldy.
«Kommýnalnık» baý-baqsha seriktestigindegi saıajaılardyń birinde saǵat 09.53-te vagon jandy.
Órt aýmaǵy 25 sharshy metrdi qamtydy. Qaýip-qaterge qaramastan, órt sóndirýshiler laýlaǵan ottyń ortasynan eki gaz ballonyn alyp shyqty.
«Tilsiz jaý» órt sóndirýshilerdiń kúshimen (5 adam, 1 tehnıka) saǵat 10.35-te aýyzdyqtaldy.
«Turǵyndardan órt qaýipsizdigi erejelerin saqtaýdy ótine otyryp, sonyń ishinde gaz ballondaryna asa muqııat bolý kerektigin aıtqymyz keledi. Óıtkeni osyndaı oqıǵa sońǵy úsh kúnniń ishinde ekinshi ret qaıtalanyp otyr», dedi QazAqparat tilshisine E.Tóregeldıev.
Eske sala keteıik, budan buryn Oralda órt sóndirýshilerdiń jalyn ishinen eki gaz ballonyn alyp shyqqanyn jazǵan bolatynbyz.
