Oralda órt kezinde jarylystan aman qalǵan qutqarýshy oqıǵany baıandady
ASTANA. KAZINFORM — 12 jeltoqsan kúni Oral qalasynda kópqabatty turǵyn úıden órt shyǵyp, oqıǵa sáti áleýmettik jelide tarady. Kadrdan órt sóndirýshiniń óz ómirin qaterge tigip, qyzyl jalynnyń ortasynda qalǵanyn kórýge bolady.
Beınejazbada baıqaǵanymyzdaı, órt sóndirýshi saty arqyly balkonǵa kóterilip kele jatady. Alaıda sol mezette kútpegen jerden jarylys bolyp, balkon qalqasy ushyp ketken.
Vıdeodaǵy balkon arqyly ishke kirýge áreket etken qutqarýshy Qýanysh Tileshov eken. Ol jarylys kezinde kásibı sheberliginiń arqasynda aman qalǵan.
— Men sol kúni kezekshilikte bolǵanmyn. Bizdegi dabyl júıesine qońyraý kelip tústi. Ózimizdiń qyzmettik boryshymyzdy óteý maqsatynda berilgen mekenjaıǵa barǵanbyz. Basynda ishte adam bar-joǵyn bilmedik. Sondyqtan jedel túrde sheshim qabyldaý kerek boldy. Solaı bizge úshinshi qabatqa kóterilý týraly buıryq berildi. Solaı joǵaryǵa kóterilip, ishke kirip, barlaý jumystaryn júrgizip jatqan kezde gaz ben aýa aralasyp, jarylys boldy. Sol kezde sekýndtar ishinde sheshim qabyldap, balkonǵa jatyp, qorǵandym. Jarylys bolǵannan keıin ishte adam joq ekenin anyqtap, birden habar berdim. Al ózim aman qaldym. Eshqandaı aryz-shaǵym joq. Jaraqat joq, — deıdi órt sóndirýshi.
Qýanysh Tileshov jarylys bolǵan sáttegi áserin bólisti.
— Jarylys bolǵanda ómirim kóz aldymnan ótti. Artymdaǵy otbasymdy oıladym. Ony aıtyp jetkizý qıyn. Biraq 3–4 sekýndtyń ishinde onyń bári basyldy. Aman ekenimdi sezgennen keıin jumysymdy ary qaraı jalǵastyrdym. Jarylys as bólmesinen shyqty. Abyroı bolǵanda, páterde eshqandaı adam bolǵan joq, — deıdi ol.
Órt sóndirýshi ózin búkil qazaqstandyqtar izdep jatqanyn biraz ýaqyttan keıin bir-aq bilgen.
— Jarylys bolǵan kezde meniń telefonym óship qalǵan. Órt sóndirip, jumys ornyma barǵannan keıin ǵana telefonǵa qaradym. Áriptesterim: «Qýanysh, seni bári izdep jatyr», — dep aıtty. Men birden otbasymdy oılasam, olar: «Seni búkil Qazaqstan izdep jatyr», — dep aıtty. Sóıtsem, áleýmettik jelige jarııalanǵan vıdeodan keıin meni tiri me, joq pa dep adamdar habar ala almapty. Sondyqtan keri baılanys jasaýǵa týra keldi. Halyq izdegen soń, aman ekenimdi bildirip, habarladyq, — deıdi ol.
Aıta keteıik, Jezqazǵanda turǵyn úı órtenip, 80-ge jýyq adam evakýatsııalandy.