Oralda órt qaýipsizdigin saqtamaǵan PIK-ke 1 mln teńge aıyppul salyndy
ORAL. QazAqparat - Oralda órt qaýipsizdigin saqtamaǵan PIK-ke 1 mln teńgege jýyq aıyppul salyndy, dep habarlaıdy QazAqparat tilshisi.
BQO TJ departamenti órt qaýipsizdigi salasyndaǵy baqylaý jáne profılaktıkalyq qyzmet basqarmasynyń bastyǵy, azamattyq qorǵaý podpolkovnıgi Erlan Tóregeldıevtiń aıtýynsha, «Dorojnık» TPIK-ine qarasty tórt kóp páterli úıdiń órt qaýipsizdigine tekserý júrgizilgen.
Tekseris barysynda TPIK basshylyǵynyń buryn belgilengen órtke qarsy is-sharalardy oryndamaǵany anyqtaldy. Mysaly, ǵımarattarda jaryqtandyrý jelileri men elektr symdarynyń jaı-kúıi tekserilmegen, búlingen elektr symdarynyń qoldanylýyna jol berilgen, elektr shamdarynyń qaqpaqshalary alynyp tastalǵan, órt bola qalǵan jaǵdaıda adamdar syrtqa shyǵatyn joldarmen qamtamasyz etilmegen. Munyń bári óreskel buzýshylyq sanatyna jatady jáne turǵyndardyń ómiri men densaýlyǵyna tikeleı qaýip tóndiredi.
Budan buryn tabys etilgen uıǵarymdy oryndamaǵany úshin memlekettik ınspektor QR Ákimshilik quqyqbuzýshylyq kodeksi 462-baby 3-bóligine sáıkes «Dorojnık» TPIK-ine qarasty ár turǵyn úıge jeke-jeke hattama toltyryp, Oral qalasy mamandandyrylǵan ákimshilik sotyna jiberdi.
«15 qarasha kúni ákimshilik hattamalarǵa sáıkes «Dorojnık» TPIK-ine 962 myń teńge kóleminde aıyppul salý jóninde sheshim qabyldandy», dedi E.Tóregeldıev.
Aıta keteıik, bıylǵy on aıda óńirde 562 órt oqıǵasy tirkelip, sonyń saldarynan 5 adam qaza taýyp, 23-i jaraqat aldy. Taldaý kórsetkenindeı, jaraqattanǵandardyń kópshiligi, ıaǵnı 15-i kóp páterli turǵyn úılerde turǵan.
