Oralda órt bolǵan saýda ortalyǵynan 150 adam syrtqa shyqty

ORAL. KAZINFORM – Oral qalasy Abaı dańǵylyndaǵy saýda oıyn-saýyq ortalyǵynda órt boldy.

BQO TJ departamentiniń baspasóz qyzmetinen málim etkenindeı, oqıǵa 31 qazan kúni saǵat 20.49-da boldy.

«Saýda ortalyǵynyń syrtqy jaǵynda úshinshi jáne tórtinshi qabattyń arasyndaǵy jarnamalyq logotıp janǵan. Saýda ortalyǵynan 150 adam óz betimen shyqty. Órt saǵat 21.05-te oqshaýlanyp, jedel túrde 21.07-de sóndirildi. Zardap shekkender joq. Órttiń shyǵý sebebi anyqtalý ústinde. Oqıǵa ornyna barlyǵy 67 adam, 20 tehnıka bardy», - dep habarlady vedomstvodan.

Kýágerlerdiń sózine qaraǵanda, kıno kórip otyrǵan keıbiri saýda ortalyǵynan tez shyǵyp úlgergen.

Eske sala keteıik, budan buryn Oral qalasynda qos qabatty kafede órt shyqqanyn jazǵan bolatynbyz.