Oralda óńirdegi eń úlken sport kesheniniń qurylysy bastaldy
Keshenniń irgetasyn Batys Qazaqstan oblysynyń ákimi Narıman Tóreǵalıev pen «QazMunaıGaz» UK» AQ tóraǵasy Maǵzum Myrzaǵalıev qalady. Oblys ákiminiń atap ótkenindeı, Qasym-Jomart Kemeluly sportty damytý máselelerine erekshe nazar aýdaryp keledi. Soǵan oraı, elimizde 2020-2025 jyldarǵa arnalǵan dene shynyqtyrý men buqaralyq sportty damytý jóninde keshendi jospar qabyldanǵany belgili.
«Prezıdentimiz óz Joldaýynda buqaralyq sportqa, dene tárbıesine basymdyq berip, ár oblysta, iri aýdan ortalyqtarynda sport úıirmelerin kóptep ashý qajettigin aıtty. Osy oraıda salaýatty ómir saltyn qalyptastyrý maqsatynda Memleket basshysynyń tapsyrmasyna sáıkes 9 aýdanda sport kesheni paıdalanýǵa berildi. Taǵy 4 keshen salynýda. 2024 jyldyń sońyna deıin biz barlyq aýdandy dene shynyqtyrý-saýyqtyrý keshenimen qamtıtyn bolamyz», - dedi N. Tóreǵalıev.
Onyń sózine qaraǵanda, Memleket basshysy bıylǵy naýryz aıyndaǵy Batys Qazaqstan oblysyna jasaǵan jumys saparynda «QazMunaıGaz» UK» AQ qarajaty esebinen Oral qalasynda kópfýnktsıonaldy sporttyq-saýyqtyrý keshenin salý máselesin pysyqtaý boıynsha tapsyrma berdi. Tapsyrmaǵa sáıkes sport kesheniniń qurylysyn júrgizý úshin 10-shaǵyn aýdandaǵy osy jer telimi belgilengen edi. Endi mine, qurylysy bastalyp otyr.
Qazirgi tańda óńir sportshylary kópfýnktsıonaldy sport ǵımaratynyń joqtyǵyna qaramastan, joǵarǵy deńgeıde óner kórsetip júr. Sońǵy eki jylda Aq Jaıyqtyń 33 sportshysy álem, 14-i – Azııa, 479-y Qazaqstan chempıony atandy.
Aıta keteıik, atalmysh ǵımaratty 2024 jyldyń aıaǵynda salyp bitirý josparlanǵan. Ol óńirdegi eń iri sport kesheni bolmaq.
