Oralda óńiraralyq kooperatsııany damytýdyń máseleleri talqylandy
ORAL. QazAqparat - Búgin BQO qurylys basqarmasynda salaaralyq balans negizinde óńiraralyq kooperatsııany damytý máseleleri talqylandy, dep habarlaıdy QazAqparat.
Onda «Memqalaqurylyskadastry» RMK bas dırektory Turlybek Musabaevtyń málim etkenindeı, qala qurylysyn josparlaý júıesi memlekettik, salalyq jáne baǵdarlamalyq qujattardy eskere otyryp, aýmaqtardy damytý baǵytynda sheshimder qabyldaǵan kezde mańyzdy tetik bolyp tabylady. Elbasy Nursultan Nazarbaev óńiraralyq kooperatsııany damytý mindetin alǵa qoıdy, bul, sóz joq, eldiń ishinde shıkizat resýrstaryn satý esebinen qazaqstandyq úlestiń artýyna yqpal etedi. Osy oraıda bir apta buryn Aqtóbede ınvestıtsııalyq forým ótip, onda óńirler arasynda yntymaqtastyq jónindegi memorandýmdarǵa qol qoıyldy. Bylaısha aıtqanda, ónimderdi tikeleı jetkizgen jaǵdaıda deldaldar qyzmeti qajetsiz bolyp qalady ári ónim baǵasy 30-40 paıyzǵa arzandaıdy. Oǵan qosa óńirlerde belgili bir ónimdi tutyný kólemi eskeriledi, ıaǵnı onyń shamadan tys artyp ketýine jol berilmeıdi.
Taǵy bir eskeretin jaıt, óndiristiń salaaralyq balansy jóninde dál de naqty derekterdi jınamaıynsha, óndiristik qýatty keshendi paıdalaný jáne óńirlerde jańa óndiris oryndaryn tıimdi ornalastyrýǵa qatysty utymdy aımaqtyq saıasatty júrgizý qıyn. Bul rette 2014 jyly óńirlerdegideı, aýdandar deńgeıinde de osyndaı derekterdi jınaý jóninde zańnamaǵa ózgerister engizildi. Al mundaı derekter aýdandyq josparlaý jobasyn jasaǵan kezde eskeriletin bolady.
Memlekettik qala qurylysyn josparlaý men kadastrlyq júıeni qalyptastyrý sondaı-aq eldi mekenderdi damytýdy keshendi basqarý men jyljymaıtyn nysandar men kommýnıkatsııalar týraly derekterdi eskere otyryp, qurylys aýmaǵyna monıtorıng jasaý úshin óńirlik memlekettik organdardy aqparattarmen qamtamasyz etip otyrady.
Kúni búgin kadastrdyń bazalyq deńgeıi Almaty, Astana jáne Oral qalalarynda qurylǵan. T.Musabaevtyń osy sapary barysynda atalmysh respýblıkalyq mekemeniń BQO-da fılıalyn ashý máselesi de sheshilmek.
Keńeste «Astana-Project» JShS dırektory Ásemgúl Ámirkenova óńiraralyq kooperatsııany damytý týraly óz oılarymen bólisti. Jıynǵa qatysýshylar da óz usynys-pikirlerin bildirdi.
Aıta keteıik, osyndaı kezdesýler buǵan deıin Kókshetaý, Aqtaý jáne Taraz qalasynda uıymdastyrylǵan bolatyn.
