Oralda ondaǵan adamdy sazǵa otyrǵyzyp ketken alaıaq ustaldy
ORAL. QazAqparat - Oralda «jıhaz jasap beremin» dep, aldyn ala aqshasyn alyp, ondaǵan adamdy sazǵa otyrǵyzyp ketken kúdikti ustaldy, dep habarlaıdy «QazAqparat» HAA tilshisi.
BQO ishki ister departamentiniń baspasóz qyzmetinen túsken málimetke qaraǵanda, atalǵan alaıaq «Olx» jarnama agenttigine «korpýsty jıhazdar daıyndaımyn» dep habarlandyrý beredi. Onyń bul qyzmetine sengen qarapaıym turǵyndar úıine shaqyrady. Aılaker jıhazdyń ólshemin alyp, dızaınymen kelisip, aldyn ala aqysyn alǵannan keıin izim-qaıym joq bolyp ketedi.
Batysqazaqstandyq tártip saqshylary jedel-izdestirý sharalary barysynda osy iske qatysy bar 1988 jylǵy Igor Solodovnıkovty quryqtady. Qazirgi kezde onyń ondaǵan adamǵa keltirgen shyǵyny anyqtalýda. Oral qalalyq ishki ister basqarmasynyń ýaqytsha ustaý ızolıatoryna qamalǵan I.Solodovnıkovke qatysty QR QK-niń 190-baby 1-bólimine sáıkes (alaıaqtyq) sotqa deıingi tergeý amaldary júrgizilýde.
Aıta keteıik, óńirde alaıaqtyq kóbeıip otyr. Alaıaqtardyń biri «páter áperýge kómektesemin» dep aldasa, ekinshisi qaryzǵa aqsha alyp, qaıtarmaıdy. Úshinshisi «plastıkalyq tereze salyp beremin» nemese «jıhaz jasap beremin» dep, keıin izim-ǵaıym joǵalady.
