Oralda ólke tarıhyna qatysty jańa anyqtamalyq jaryq kórdi
ORAL. QazAqparat - Búgin oblystyq memlekettik muraǵatta «Batys Qazaqstan oblysy nomenklatýralyq qyzmetkerleriniń anyqtamalyǵy» atty qos tomdyq jınaqtyń tanystyrylymy boldy, dep habarlaıdy «QazAqparat» HAA tilshisi.
Sharaǵa qatysqan oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtyń aıtýynsha, 2016 jyly Táýelsizdigimizdiń 25 jyldyǵyn atap ótken elimiz, sonyń ishinde ólke tarıhynda este qalarlyq oqıǵalar az bolǵan joq. Osy oraıda oblysta basshylyq qyzmetter atqarǵan adamdardyń ómirbaıandary jınaqtalǵan atalǵan ǵylymı anyqtamalyq zertteýshiler úshin de qundy.
Oblystyq memlekettik muraǵat dırektory Aıjan Saýǵabaevanyń sózine qaraǵanda, anyqtamalyqty qurastyrýshylardyń eńbegi mol. Kitapta 1919-1991 jyldary Batys Qazaqstanda gýbernııalyq, ýezdik, oblystyq, qalalyq, aýdandyq partııa komıtetteriniń hatshylary týraly málimetter, barlyǵy 870 basshy qyzmetkerdiń ómirbaıany berilgen.
