Oralda Olımpıada júldegerleriniń qatysýymen alǵash ret dýatlon jarysy ótti
ORAL. QazAqparat - Oralda Astananyń 20 jyldyǵyna oraı alǵash ret dýatlon jarysy ótti, dep habarlaıdy QazAqparat tilshisi.
Elbasy tapsyrmasyna sáıkes buqaralyq sportty keńinen damytý maqsatynda uıymdastyrylǵan jarysqa qurmetti qonaq retinde ataqty boksshylar, Olımpıada oıyndarynyń kúmis júldegerleri Ádilbek Nııazymbetov pen Vasılıı Levıt qatysty.
Kúnniń ystyǵyna qaramastan, 20 kılometrlik jarysqa 100 dýatlonshy shyqty. Olar aldymen 5 km qashyqtyqty júgirip ótip, sosyn 12,5 shaqyrymdy velosıpedpen artqa qaldyrýy tıis. Oǵan qosa sońǵy 2,5 shaqyrymdy taǵy da júgirip ótýi kerek bolatyn. Sonymen qatar 400-deı sportshy jeke qashyqtyqtarda (5 km, 12,5 km jáne 2,5 km) synǵa túsýdi jón dep tapty.
Jarys qorytyndysynda 41-50 jastaǵylar arasynda Marat Sabyrǵalıev jeńimpaz atandy. 31-40 jastaǵylardan erlerden Alekseı Alıev, áıelderden Olga Kelazeva ozdy. 18-30 jastaǵylardan Erlan Oılybaev pen Anastasııa Vavılına márege birinshi jetti. Olardyń bárine de velosıpedter tabys etildi. Sonymen qatar jeke qashyqtyqtarda jeńimpaz-júldeger atanǵandar da marapattaldy.
V.Levıt pen Á.Nııazymbetov mundaı jarystardy kóptep uıymdastyrý qajet ekendigin atap kórsetti.
«Osyndaı sharalardyń kóp bolýy bárimiz úshin mańyzdy. Árkim óziniń densaýlyǵy úshin sportpen aınalysýy kerek. Halqymyz bizdi, sportshylardy únemi qoldap, dem berip otyrady. Biz de múmkindiginshe kópshilik sharalarǵa qatysyp, jurtshylyqty qoldap kelemiz. Elbasymyzdyń bastaýymen elimiz de, Astanamyz ben óńirler de damyp, órkendeı bersin», dedi Olımpıadanyń eki márte kúmis júldegeri Ádilbek Nııazymbetov.
