Oralda Olımpıada júldegeri Larıonovaǵa páter berildi

ORAL. QazAqparat - Búgin Astana kúni qarsańynda Oralǵa qarasty Zachagan kentinde «Qazaqstannyń turǵyn úı qurylys jınaq banki» salymshylaryna arnalǵan 144 páterlik toǵyz qabatty turǵyn úı paıdalanýǵa berildi, dep habarlaıdy «QazAqparat» tilshisi.

Saltanatty jıynda oblys ákimi Altaı Kólginovtiń atap ótkenindeı, óńirde Elbasy bastamasymen qolǵa alynǵan «Nurly jer» baǵdarlamasyna sáıkes 11 kópqabatty turǵyn úı (1600 páter) salynyp jatsa, sonyń 10-y - Oralda, bireýi Aqsaıda boı kóterýde. Sondaı-aq segiz aýdanda 245 páterlik 191 birqabatty úı turǵyzylmaq. Osy úıler qurylysyna 10 mlrd. astam teńge, ınfraqurylym tartýǵa 2 mlrd. astam teńge bólindi.  

Sharaǵa qatysqan «Qazaqstannyń turǵyn úı qurylys jınaq banki» AQ basqarma tóraıymy Lázzat Ibragımova atalmysh banktiń óńirdegi salymshylary 47 myńǵa jetkendigin, aldaǵy ýaqytta bul baǵyttaǵy jumystyń jalǵasatynyn málim etti.

Óńir basshysy saltanatty shara barysynda áıelder kúresinen Rıo Olımpıadasynyń qola júldegeri Ekaterına Larıonovaǵa da bir bólmeli páterdiń kiltin tabys etti. Olımpıadadaǵy jeńisinen keıin ýáde etilgen páterdi berý túrli sebeptermen kesheýildep qalǵan bolatyn. Onyń sáti búgin túsip otyr.

Eske sala keteıik, E.Larıonova ótken jyly jaraqatyna qaramastan, Olımpıadaǵa qatysyp, qola júldege qol jetkizgen bolatyn. Sodan keıin oǵan Germanııada ota jasalyp, emdeldi.

«Katıa densaýlyǵy qalpyna kelgennen keıin jattyǵýǵa qaıta kirisetin bolady», - dedi palýannyń anasy Natalıa Larıonova.