Oralda oqýshyny qaǵyp óltirgen júrgizýshi qyz 2 aıǵa qamaýǵa alyndy
ORAL. QazAqparat – Oralda 10 jasar balany kóligimen qaǵyp óltirgen 22 jastaǵy júrgizýshi qyz qamaýǵa alyndy, dep habarlaıdy QazAqparat tilshisi.
BQO prokýratýrasynyń baspasóz qyzmetinen málim etkenindeı, Oral qalasynyń mamandandyrylǵan tergeý soty qylmystyq qýdalaý organynyń atalǵan júrgizýshige eki aı merzimge qamaýǵa alý túrindegi bultartpaý sharasyn qoldaný jónindegi ótinishin qanaǵattandyrdy.
Budan buryn habarlaǵanymyzdaı, 17 qarasha kúni Oralda jol apatynan 10 jasar bala qaza tapqan bolatyn. Rýlde 22 jastaǵy qyz bolǵan. Oqýshy aýyr halde aýrýhanaǵa jetkizilgenimen, jansaqtaý bóliminde kóz jumdy.
Osyǵan baılanysty QR QK 345-baby 3-bóligine sáıkes qylmystyq is qozǵalyp, tergeý amaldary júrgizilýde.
